Kryetari i Partisë Demokratike, Sali Berisha gjatë konferencës me gazetarët, ka theksuar edhe njëherë se statuti i partisë do të respektohet me përpikmëri, në lidhje me situatën ku ndodhemi.
Ndër të tjera Berisha tha ‘me statut, kryetari që humbet zgjedhjet lokale, kalon në votëbesim. Dhe e njëjta gjë do të ndodhë si me zgjedhje të vjedhura, ashtu edhe me zgjedhje të lira’.
Reagimi i kryetarit të PD-së, Sali Berisha:
Për të gjithë ata që mendojnë se denoncimi ndaj kontrollit dhe deformimit të qytetarëve në këto zgjedhje vjen si alibi për karrige, dua t’i them të reflektojnë një moment. Ky problem është i zgjidhur me Statutin e Partisë Demokratike.
Me statut, kryetari që humbet zgjedhjet lokale, kalon në votëbesim.
Dhe e njëjta gjë do të ndodhë si me zgjedhje të vjedhura, ashtu edhe me zgjedhje të lira. Pa asnjë lloj dallimi. Pra, unë nuk kam nevojë për asnjë lloj alibie, sepse statuti do të zbatohet pikë për pikë. Njëlloj sikur zgjedhjet të ishin super të ndershme e të lira.
E gjithë përpjekja ime për të sjellë para publikut kontrollin dhe deformimin e votës përmes blerjeve, presioneve, intimidimit, shfrytëzimit të paligjshëm të parave publike, bëhet si një detyrim ndaj demokracisë, interesit kombëtar dhe ndaj të gjithë atyre qytetarëve që kanë votuar kundër sistemit, ose që kanë pasur frikë të votojnë kundër tij.
Ky denoncim duhet të jetë sot kryefjala e të gjithë shoqërisë, sepse një shoqëri që nuk zhvillon zgjedhje të lira, të ardhme nuk ka.
