Partia Socialiste arriti të fitojë të gjashta bashkitë e qarkut Fier, duke rikonfirmuar në disa prej tyre kryebashkiakët aktualë.
Për të folur mbi suksesin e të majtës në Fier, nga selia e PS foli kreu i Grupit Parlamentar dhe njëherësh drejtuesi politik i këtij qarku, Taulant Balla.
Balla nuk e fshehu entuziazmin duke u shprehur se “kryeqyteti i socialistëve ka korrur një fitore të thellë”, por u bë i pari në radhët e socialistëve që u ndal të komentonte raportin paraprak të OSBE/ODHIR mbi zgjedhjet.
Ai iu përgjigj deklaratave të shefes së misionit të vëzhguesve ndërkombëtarë Audrey Glover e cila është shprehur se gjatë fushatës elektorale nuk është folur për çështje të komuniteteve apo për çështjet lokale.
Fokusimin e kritikës ndërkombëtare te shterpësia e problemeve që shqetësojnë komunitetet në të 61 bashkitë e vendit, refuzon ta pranojë Balla, i cili e quajti deklaratën e Glover jo korrekte.
Balla iu drejtua vëzhguesve ndërkombëtarë, duke thënë që të mos monitorojnë mediat por terrenin dhe do të kuptojnë kontaktin e fortë që kishin me qytetarët në këtë fushatë.
“Dua t’i përgjigjem znj.Glover, se raporti i tyre paraprak që kishin një vlerësim që në këtë fushatë nuk u pa të flitej për çështje të kominiteteve, për çështjet lokale, unë nuk e di në çfarë takimesh kanë qenë apo e kanë parë këtë gjë, sigurisht ne do t’ua shkruajmë dhe do t’ua vemë në dispozicion. Nëse këta u referohen mediave, nëse kanë ardhur të monitorojnë se çfarë pasqyrimi i kanë bërë mediat fushatës kjo është një çështje tjetër që nuk ka të bëjë me fushatën. Unë mendoj se çfarë është pasqyruar në media nuk ka lidhje fare me atë që ka ndodhur në territor. Unë ftoj të shkojnë dhe të kontaktojnë një fshat të vetëm ku ne kemi qenë dhe kemi komunikuar me njerëzit, ku pjesa kryesore e fushatës ka qenë pjesa që lidhet me diskutimet, raportimer që kanë bërë kandidatët për punët që janë kryer dhe punë që do bëhen dhe ky ka qenë diskutimi thelbësor i fushatës dhe kjo është dhe arsyeja e madhe e një fitoreje kaq të thellë të Partisë Socialsite në qarkun e Fierit, prandaj të monitorsh mediat dhe të dalësh të thuash që nuk pati një diskutim mbi problematikat që shqetësojnë komunitetin, besoj që nuk është korrekte dhe besoj që kjo është diçka paraprake që do rishikohet deri në fund të këtij raporti. Vlen të theksohet që edhe në raportin e vëzhguesve zgjedhjet ishin konkurruese”, tha Balla.
