Procesi zgjedhor në qendrën e votimit të ngritur në shkollën “Bardhyl Popa” në Elbasan nuk duhet të ndërpritet, megjithëse komisioneri i opozitës deklaroi se ai votoi për Luciano Boçin dhe sistemi i KQZ-së e regjistroi si votë për rivalin e tij socialist, Gledjan Llatja.
Burime zyrtare nga Komisioni Qendror i Zgjedhjeve, të kontaktuar me telefon nga “Boldnews.al” deklaruan se Kodi Zgjedhor parashikon që pretendime të ngjashme mund të parashtrohen në proces ankimor vetëm pas mbylljes së votimeve.
Pra, praktikisht, nëse ka ndodhur me të vërtetë skandali i denoncuar nga komisioneri opozitar, verifikimi i saj do të mbetet në një moment të mëvonshëm.
Dhe, nëse skandali mund të ketë përmasa më të gjera edhe në qendra të tjera votimi, atëherë rezultatin e zgjedhjeve në Elbasan e ka “përcaktuar” sistemi dhe i gjithë angazhimi qytetar është i kotë.
Megjithatë, burimet zyrtare nga KQZ deklarojnë se sistemi elektronik i votimeve nuk mund të ketë probleme të tilla.
