Kryedemokrati Sali Berisha ka dalë në një konferencë urgjente për mediat nga selia e PD, së bashku me ish-kryekomunarin e Shëngjinit, Salvdaor Kaçaj për të denoncuar ngjarjen e ndodhur vetëm 15 minuta pas mbylljes së procesit zgjedhor, ku 56-vjeçari dhe i biri u kërcënuan me armë.
Sipas një denoncimi në polici nga Kaçaj, atij teksa ishte duke lëvizur me të birin dhe shoferin në aksin rrugor Lezhë-Milot, dy persona i kanë prerë rrugën dhe njëri prej tyre mbante në dorë armë zjarri të llojit pistoletë.
Shoferi i makinës së Kaçajt, i cili mbështeste në këto zgjedhje kandidatin e koalicionit “Bashkë Fitojmë”, Pashk Gjoni, ka manovruar duke e kthyer mjetin në drejtim të Lezhës dhe menjëherë janë paraqitur në polici ku kanë bërë edhe kallëzimin.
Referuar rastin në fjalë lideri i opozitës Sali Berisha, e cilësoi një atentat të dështuar dhe hodhi akuza të forta në drejtim të kryeministrit Edi Rama dhe kryebashkiakut të Lezhës, Pjerin Ndreu si organizatorë të tij.
“Sot dola para jush për një rast kriminal të jashtëzakonshëm, ku Salvator Kaçit, një nga eksponentët kryesorë të PD në Lezhë, ish-kryetar i Bashkisë së Shëngjinit, njeri me një reputacion kombëtar dhe ndërkombëtar në fushën e sportit, e kanë ndjekur dy makina pa targa, ku ai ka qenë bashkë me djalin e vet dhe shoferin.
Persona të maskuar, të armatosur kanë dalë nga makina dhe janë bërë gati të qëllojnë mbi ta. Shoferi i Salvatorit, një ish-gardist i sprovuar ka arritur të manovrojë me makinë dhe t’i bëjë të pasigurtë në atentatin e tyre.
Ata e kanë ndjekur mbrapa me armë në dorë që t’i vrisnin, nuk kanë arritur. Por të gjitha këto janë të filmuara.
Unë ju them ju se dje dhe pardje, bandat e Pjerin Ndreut kanë terrorizuar zonë pas zone rrethin e Lezhës dhe e kanë bërë këtë akt, i kemi të filmuara, në shoqërim nga policia, e cila kalonte afër dhe as që iu thoshte, përkundrazi krijonte përshtypjen te banorët se po bënte sigurimin e banditëve.
Pra, kjo ka qenë situata në Lezhë që kulmi me përpjekjen për eliminimin fizik të Salvatorit dhe djalit të tij, që është shtetas amerikan dhe ka ardhur për të votuar me familjen e vet. Ky atentat i dështuar ndaj Salvator Kaçit është vepër kryekëput e Edi Ramës dhe Pjerin Ndreut”, tha Berisha.
Më tej Berisha theksoi se ngjarja e sotme është derivat i gjuhës së dhunës dhe kërcëmnimeve që Edi Rama përdori në fushatën elektorale, ku sipas kreut të koalicionit “Bashkë Fitojmë”, kryeministri “u mor personalisht me Salvatorin në në fjalimin e tij në Lezhë”.
Berisha nënvizoi gjithashtu se mbështetja e një njeriu me influencë në qarkun e Lezhës për kandidatin opozitar Pashkë Gjoni në këto zgjedhje, ka tronditur pozitat e bandave të Pjerin Ndreut, ndaj ata tentuan t’i marrin jetën.
“Salvatori krahas mbështetjes ndaj kandidatit Pashk Gjoni, ka zbatuar gjithë jetën e tij rregullat dhe ligjet elektorale dhe nuk ka asnjë veprim të paligjshëm. Por mbështetja për Pashk Gjoni nga Salvatori ka kërcënuar zgjedhjen e banditit Pjerin Ndreu dhe kanë krijuar bashkë me Ramën një mënyrë për eliminimin e tij bashkë me djalin në makinë.
Ky akt është një krim i shëmtuar, personalisht i Edi Ramës dhe Pjerin Ndreut, me të cilin ata kanë synuar me çdo kusht dhe çdo çmim të ndryshojnë rezultatin në Lezhë nëpërmjet një akti të tillë dhe natyrisht eliminojnë fizikisht një kundërshtar të shpallur nga Edi Rama si njeri të rrezikshëm për rezultatin e tij në Lezhë.
Unë dënoj me ashpërsinë më të madhe këtë akt. Sigurisht që ky është akt kulmor në terrorin ndaj drejtuesve të PD, por raste të tjera me kërcënime të forta dhe të egra ekzistojnë dhe ne do i bëjmë publike. Theksoj se të gjitha këto akte dhune të bandave janë përcjellë me indiferencë të plotë ose mbështetje nga policia. Salvatori ka bërë denoncimi dhe janë marrë edhe kamerat ku duket qartë gjithçka”, nënvizoi ai.
