Për ambasadoren amerikane në vendin tonë Yuri Kim, reforma në drejtësi po funksionon.
Jo vetëm kaq, por sipas diplomates po funksionon aq mirë, sa që ka ngjallur frikë te të korruptuarit, të cilët janë kthyer në kundërshtarë të saj.
“Duhet të jemi ende më të kujdesshëm për rreziqet që shfaqen përpara Reformës në Drejtësi. Kundërshtarët e Reformës në Drejtësi duan që ajo të dështojë, pasi po shohin se ajo po funksionon. Ata do të donin të fshinin veprimet e tyre korruptive, duan të jenë në gjendje të vazhdojnë të bazohen në pandëshkueshmëri. Kjo është një shenjë që Reforma në Drejtësi po funksionon me të vërtetë, por tregon gjithashtu se sa e rëndësishme është që të gjithë ne së bashku, Gjykata e Lartë, SHBA-të, BE dhe të gjitha vendet partnere tonat të qëndrojmë të përkushtuar ndaj kësaj detyre. Ju mund të keni sa më shumë mbështetje ndërkombëtare, por në fund i përket drejtuesve shqiptarë, Shqipërisë, ne do ju vazhdojë t’ju mbështesim, ua premtoj. Kjo nuk ka për të ndryshuar”, tha Kim në një aktivitet në kuadër të 110 vjetorit të themelimit të Gjykatës së Lartë.
Më tej, la të kuptohet se reforma që sapo lavdëroi, është e kapur ende nga politika.
“Themeli i Reformës në Drejtësi në Shqipëri është ndarja e gjyqësorit nga ndikimi politik, por është e pamundur nëse mbizotërojë modelet e vjetra. Nuk duhet të vazhdojë. Janë vendosur të gjithë mekanizmat ligjor për të vendosur një sistem drejtësia bazuar në mekanizmat e shtetit të së drejtës. SHBA-të mbeten të përkushtuara për të mbështetur drejtësisë. Puna që po bëni është thelbësore për këtë”, tha ajo.
Nga ana tjetër, ambasadorja e Delegacionit të BE në Tiranë Christiane Hohmann u shpreh më pak entuziaste se sa homologia amerikane.
“Nuk ka anëtarësim në BE pa reformë të suksesshme në drejtësi”, solli ajo në kujtesë.
“Institucionet kyçe të drejtësisë, janë krijuar dhe rikrijuar. Reforma po zë rrënjë, por duhet të zërë rrënjë të thella. Do duhet t’i bëjë ballë influencave. Duhet të tregohet integritet. Procesi i vettingut vijon të ecë në mënyrë graduale. Pasi të përfundojë ky proces, të dy gjyqësorët duhet të ruajnë frymën. Duhet të sigurohet llogaridhënie dhe përgjegjësi te sistemi i drejtësisë. Gjyqtarët dhe prokurorët duhet të zbatojnë detyrën. Drejtësia e vonuar minon besimin e qytetarëve”, shtoi më tej Hohmann.
Entuziazëm si ambasadorja Kim nuk shprehu as Presidenti Bajram Begaj, i cili u ndal më së shumti te misioni i reformës.
“Garantimi i pavarësisë së sistemit e cila është arsyeja e reformës në drejtësi. Cilësia në drejtësi është dhe duhet jetë kriteri matës për të përcaktuar punën e gjithë aktorëve të përfshirë. Pavarësisht se puna akumuluar paraqet sfida e problematika dua t’ju përgëzoj. Uroj të jetë një shembull suksesi duke dëshmuar, profesionalizëm, integritet, paanëshmëri”, u shpreh kreu i shtetit.
Lidhur me aktivitetin, ka reaguar dhe ish-ministri i Drejtësisë Ylli Manjani. Përmes një postimi me nota ironie në rrjetet sociale, ai e quan mort.
Manjani shkruan:
Te Rogneri parkova biçikletën dhe thashë të pi kafenë e përditshme.
Pashë shumë makina të zeza. Zyrtarë të qeverisë, shtetit e drejtësisë me kostume te zinj. Edhe ambasadorë të veshur me të zeza.
- Ç’është ky mort? – pyeta te recepsioni.
- Është dita e drejtësisë – më tha punonjësja.
- Qenka me gjithë mend mort.
- Të rroni e ta kujtoni!- i thashë vetes dhe u nisa për gjyq.
