Ilir Meta është i bindur se opozita e bashkuar do të arrijë të mposhtë socialistët në trekëndëshin e rëndësishëm Tiranë-Elbasan-Durrës, në zgjedhjet lokale të kësaj të diele.
Kreu i PL në një intervistë për “Opinion” është shprehur se kandidati për bashkinë e Tiranës së koalicionit “Bashkë Fitojmë”, Belind Këlliçi do të fitojë më shumë se 60% të votave, për t’i hequr nga duart mandatin e tretë Erion Veliajt.
Meta gjithashtu bëri me dije se objektivi kryesor i bashkive që do të fitohen nga ky koalicion është transparenca për çdo shpenzim të buxhetit, ndërsa vlerësoi marrëveshjen me Sali Berishën.
“Kam marrëveshje me gjigandin Sali Berisha. Dy gjëra kemi ne transparencë absolute në bashki dhe kjo është në interes të qytetarëve. Ju në 4 vjet nuk keni parë asnjë mbledhje të këshillit bashkiak të të Tiranës dhe çdo gjë ka kaluar me firmën e asaj që nuk e njihnim. Mua më intereson, Bashkia e Tiranës, para të gjithë qytetarëve, sa janë investimet, shpenzimet, rruga, kopshtet, çerdhja. Bashkia e Tiranës është fituar me 60%”, -tha Meta.
Më tej ai shtoi se një tjetër objektiv është fitorja e 80% të këshillave bashkiakë në të gjithë vendin
“Fitorja e trekëndëshit Tiranë Durrës dhe Elbasan është fitore e pa diskutueshme, është minimumi që mund të fitojmë. Nuk ndodh që mos fitojmë. Nuk ka dështim për opozitën në këto zgjedhje. Objektivi të kemi 80% të këshillave bashkiakë. Përsa i takon çështjes së kandidatëve, absolutisht nuk ka limit këtu se garojmë në të gjitha bashkitë. Në Korçë është e pa diskutueshme fitorja. Shqiptarët të shkojnë të votojnë, pasi ai që nuk voton nuk ka të drejtë të kërkoj llogari nesër. Fitorja do të jetë e thellë në të gjithë Shqipërinë”, deklaroi Meta.
