Nga Kukësi ku prezantoi Admir Sinamatin si kandidatin e koalicionit opozitar Ish-kryeministri Sali Berisha “Bashkë Fitojmë” për zgjedhjet lokale të 14 Majit, Sali Berisha e akuzoi kryeministrin Edi Rama si armik të këtij qyteti dhe gjithë Veriut.
Për të mbështetur akuzën e tij të fortë, Berisha iu referuar shkëputjes nga skema e ndihmës ekonomike të 20 mijë familjeve në qarkun e Kukësit në 2013, sapo Edi Rama mori pushtetin.
Sipas ish-kryeministrit, arsyeja kryesore përse Rama i dënoi këto 20 mijë familje të Kukësit me bukën e gojës, është vetëm se nuk e votuan.
“Duke votuar për Admir Sinamatin, ju njëkohësisht ju keni dhënë ndëshkimin e merituar, Edi Ramës armik i betuar i Kukësit dhe gjithë veriut të Shqipërisë. Antishqiptar i paprecedentë. Ju garantoj se në historinë e veriut dhe të Kukësit, pas car Dushanit dhe Enver Hoxhës, Edi Rama është armiku më i egër.
Do analizojmë pak. Në vitin 2013, akti i parë i urrejtjes ndaj jush, ndaj banorëve të qarkut, ishte heqja e ndihmës ekonomike për 20 mijë familje. Por ai që e njeh Kukësin, ai që i njeh fshatrat e qarkut, nga Curraj i Epërm në Kala të Dodës, ai e di se as 10% e familjeve nuk mund të vetëmbahen pa ndihmën e shtetit. Ai e di se 80% e familjeve meritojnë 100% ndihmën ekonomike. Çdo qeveritar i vendit e din se qarku i Kukësit, jo më i varfër në Shqipëri, është qarku më i varfër i Europës. Dhe ky i pashpirt mori e hoqi me një të rënë të lapsit 20 mijë familje, vetëm e vetëm se pse nuk e votuat. Vetëm e vetëm se u qëndruat besnikë idealeve tuaja“, u shpreh Berisha.
