Kryeministri Edi Rama po kryen homazhe sot pranë varrezave të dëshmorëve, ndërsa jashtë mbahen larg nga policia familjarë të personave që kanë luftuar, për shkak se një pjesë e tyre mban në dorë fotografi të ish-diktatorit Enver Hoxha.
Në të njëjtën kohë gjatë vizitës së Ramës, kanë shkuar edhe ithtarët e Enver Hoxhës të cilët mbajnë në dorë pankartat e idhullit të tyre por nuk janë lejuar nga policia që të futen në varrezat e dëshmorëve për shkaka të vizitës së kryeministrit.
“Nuk janë të vërteta ato që keni parë, nuk na lënë që të hyjmë brenda policia. Ne na takon, se luftët e kanë bërë partizanët, Enver Hoxhën e mbaj se e ndriti vendin për 45 vjet me shkollim dhe me të gjitha gjërat, me ushtri, me armatim”, thotë një prej ithtarëve të diktatorit.
“Unë e mbaj dhe do ta mbaj, kam shkuar në punë ku ka qenë nevoja. Shtëpia ime ka qenë bazë lufte, ne nuk na kanë trajtuar hiç fare. Ky ishte burrë, na dha shkollë na dha edukatë, na dha çdo gjë”, u shpreh një tjetër.
