Me vetëm një tepsi dhe petën e shtruar mbi të që personifikon “Shqipërinë” dhe buxhetin e shtetit, lideri i opozitës Sali Berisha, ka treguar në një video mënyrën sesi Edi Rama dhe ministrat e tij kanë vjedhur 5.9 miliardë euro të qytetarëve.
Video në fjalë është pjesë e spotit të radhës të koalicionit opozitar “Bashkë Fitojmë” për zgjedhjet lokale të 14 Majit me titull “Shqipëria nuk është e varfër, Shqipëria është e vjedhur”, që zbërthen vjedhjen e miliona eurove në këto 10 vite qeverisjes të Ramës.
“Kjo është tepsia që Edi Rama u kërkonte shqiptarëve. Çfarë bëri këto vite Edi Rama me këtë tepsi? Miliona euro u vodhën për luksin e shfrenuar të Rilindjes. Tepsia e Edi Ramës iu kushtoi shqiptarëve 5.9 miliardë euro. Ku shkoi e gjithë pasuria e shqiptarëve? Tepsia u vodh nga Edi Rama dhe familja e tij që marrin çdo tender. Tepsia u vodh nga ministrat e rilindjes, nga kryebashkiakët kriminelë dhe krimi i organizuar”, nënvizohet në spot.
Duke ndërgjegjësuar qytetarët për atë çfarë ka ndodhur me financat publike dhe për t’i kërkuar që të frenojnë abuzimin me paratë e tyre, në spot nënvizohet se në datën 14 maj nuk votojmë vetëm bashkitë, por “votojmë kundër vjedhjes”.
“Ndryshimi në duart e tua! Në 14 maj voto numrin 1, “Bashkë Fitojmë”!”, thuhet në deklaratën shoqëruese të spotit, e më pas renditen të gjitha tenderat korruptivë të kryeminisrit dhe rrethit të tij të ngushtë, me të cilat janë pasuruar në këto 3 mandate.
“21 milionë euro për fluturimet e Ramës me avion taksi. Darkat 10 mijë euro në restorante të shtrenjta. 4 milionë euro për oborrin e Kryeministrisë, që vetëm Edi Rama mund ta shohë. Në një vit shqiptarët kanë humbur një rrogë.
Inceneratorët që nuk ekzistojnë janë vjedhja më e madhe në historinë e Shqipërisë. 430 milionë euro, me vet firmat e Ramës dhe Veliajt. Me aq para pensionet dyfishoheshin. KLSH ka raportuar 1.2 miliardë euro të vjedhura në 10 vite. Me aq para çdo rrogë do të ishte rritur me dyfish.
Sulmet që Edi Rama u bën mediave dhe shqiptarët do t’i paguajnë deri në 1.6 miliardë euro. Një tjetër faturë që rroga do të mund të mbidyfishoheshin.
Vjedhja tjetër ndodh me bashkitë. Me rilindjen urbane 2.3 miliardë janë hedhur në fasada dhe sheshe. Ky çmim nuk justifikon as përafërsisht kostot e investimit”, theksohet aty.
Sakaq në fund ka vend edhe për disa thërrime, ato “që Edi Rama ka lënë te tepsia për shumicën e shqiptarëve, qofshin ata demokratë, socialistë, apo pa parti”.
Opozita ngul këmbë se pikërisht këto thërrime të mbetura nga tepsia që gllabëroi pushtetit, janë arsyet pse shqiptarët ikin, vriten me njëri-tjetrin dhe jetojnë në mjerim.
