Nga Boldnews.al
Në vitin 2021, Autoriteti Rrugor Shqiptar shpalli fitues firmën “Geci” për vijimin e punimeve të rrugës në Porto Romano, Durrës. Megjithëse kishte ofruar plot 3 milionë euro më shumë se oferta më e ulët, kjo firmë u favorizua në atë kohë nga dyshja ministrja Belinda Balluku dhe drejtori i ARRSH-së Evis Berberi. Koha vijon dhe kjo dyshe, që këto ditë është parë më shumë në qarkun e Dibrës, ku dhe Balluku është përfaqësuese politike e PS-së, vijojnë me të njëjtën skemë. Me një tender pa garë dhe pa kundërshtarë, Balluku-Geci kanë “shpërblyer” me plot 5 milionë euro firmën Geci për të rregulluar punët e bëra gabim në të kaluarën. Në dokumente është shkruar mjaft qartë se punimet në ato rrugë janë bërë shkel e shko dhe pavarësisht kësaj janë marrë në dorëzim nga institucionet shtetërore.
Sipas dokumenteve që disponon BoldNews.al, Autoriteti Rrugor Shqiptar ka shpallur fitues të njëjtën firmë që në atë segment kishte përfituar plot 10 milionë euro. Dokumenti i mësipërm është shpallja e njoftimit të fituesit të rrugës në Porto Romano, e cila ka pasur një objekt “plotësimi i punimeve të mbetura në aksin Porto Romano – Durrës Loti 3”. Fondi limit i kësaj procedure ka qenë 499.999.420 lekë pa TVSH, ose me TVSH rreth 5 milionë euro. Kohëzgjatja e kontratës për zbatimin e saj ka qenë 12 muaj.
“Me anë të këtij njoftimi ju informojmë se, në këtë procedurë kanë marrë pjesë Ofertuesit e mëposhtëm me këto vlera përkatëse të ofruara: 1. OE “GECI” me vlerë 487.974.259 lekë pa TVSH”, – thuhet në këtë dokument. Pra ka qenë oferta e vetme në garë. Por, përse kanë pasur frikë firmat e tjera të merrnin pjesë? Natyrisht, të gjitha të mëdhatë kanë marrë nga torta e “ARRSH”-së, por duke qenë se Geci kishte një kontratë në atë zonë, dhe madje u favorizua në procedurën e mëparshme, të gjitha firmat e tjera janë stepur.
Në dokumentet shoqëruese, Autoriteti Rrugor Shqiptar shkruan se projekti “ndërtim rruga Porto – Romano” është hartuar nga kompania “AE-ITP në vitin 2008.
“Gjatësia e segmentit rrugor të projektuar 8.166 km së bashku me degëzimet. Ky projekt është ndarë për zbatim në 3 lote. Nga (km 0+00 ÷ 2+100) rruga zhvillohet në vijë të drejtë dhe në km 0+160 ka të realizuar një rrethrrotullim. Punimet ne këtë objekt janë realizuar ne baze te kontratës të lidhur ndërmjet BOE “SIAC+Alb Building” shpk. dhe ish Drejtorisë se përgjithshme të Rrugëve. Punimet në këtë objekt kanë përfunduar sipas proces verbaleve të Akt kolaudimit dhe janë marrë në dorëzim punimet e kryera të këtij projekti brenda vlerës së kontratës së nënshkruar”, thuhet në këto dokumente.
Më tej sqarohet se nga km 2+100 ÷ 4+800 zhvillohet në vijë të drejtë dhe në km 2+190 ka të realizuar një rrethrotullim. “Punimet në këtë objekt janë realizuar në bazë të kontratës të lidhur ndërmjet BOE ‘Gener 2 + Karl Gega + Spartaku’ shpk dhe ish Drejtorisë së Përgjithshme të Rrugëve. Punimet në këtë objekt kanë përfunduar sipas proces verbaleve të Akt kolaudimit dhe janë marrë në dorëzim punimet e kryera të këtij projekti brenda vlerës së kontratës së nënshkruar”, – thuhet në dokumente.
Më tej shkruhet se “plotësimi i punimeve të mbetura në aksin Porto Romano, Durrës Loti 3”, projekti që do zbatohet ka të bëjë me përfundimin e punimeve në aksin rrugor Porto Romano, loti 3 si dhe disa rrugëve dytësore. Pra, i atyre punëve që janë bërë dhe marrë në dorëzim nga ARRSH-ja apo ish Drejtoria e Përgjithshme e Rrugëve. Por nëse i kanë marrë në dorëzim dhe po ribëhen, kush e mban përgjegjësinë? A ka pasur ndonjë hetim të brendshëm?
Askush nuk do të kalojë “vijën e kuqe”, qoftë me ish drejtorët apo firmat që kanë kryer ato punime. Drejtuesit aktualë, Balluku-Berberi më shumë mendojnë sesi të bëjnë tenderët e radhës. Më sipër ne faktuam se për tenderin e fundit, firma “Geci” ishte e vetme në garë dhe mori “shpërblim” 5 milionë euro. Po a ka pasur kontratës në atë vend? BoldNews.al ka denoncuar në nëntor të vitit 2021 procedurën e mëparshme, me titull “3 mln euro më shumë, Berberi shpall fitues kompaninë ‘Geci’ për ndërtimin e rrugës në Porto Romano”.
Objekti i kontratës ishte “ndërtim rruge Porto – Romano Durrës, vazhdimi”, ku vlera e kontratës së këtij tenderi ka qenë plot 10 milionë euro. “Skema e Berberit dhe Ballukut është te specifikimet e famshme. Ka dyshime se ato bëhen për të favorizuar apo s’kualifikuar X apo Y firmë”, – shkruante BoldNews.al.
Në dokumente saktësohej se në këtë tender garuan 8 firma të mëdha ndërtimi. Në këtë rast diferenca nga oferta më e ulët te e fituesit është plot 3 milionë euro. Oferta më e ulët ka qenë e “Alb Building” me vlerë 736,913,771 lekë, ndërkohë fituesi i këtij tenderi, “GECI”, ofroi një vlerë prej 1.175.927.028 lekë.
Më tej, ARRSH-ja shkroi se “arsyet e skualifikimit të Alb Building është se ka ofertë ‘anonimalisht të ulët’”.
