“Mund të jesh ambasador. Mund të jesh biznesmen ose hajdut i rangut të lartë. Mund t’ju thërrasin doktor, ose mund t’ju quajnë shef. Por do të duhet t’i shërbesh dikujt.”
Vargjet janë pjesë e këngës “Gotta Serve Somebody” të publikuar në vitin e largët 1979 nga Bob Dylan – i cilësuara gjerësisht një nga kantautorët më të mëdhenj që ka njohur bota e muzikës.
Një prej atyre që dëgjojnë ende këtë lloj muzike, për dikë të dalë mode e për ditë tjetër të pavdekshme, iu kujtuan vargjet teksa shihte takimin e kryeministrit Edi Rama në Korçë dhe dëgjonte ta mbyllte me këngën e fushatës.
Një sqarim thelbësor: Bod Dylan dhe “Gotta Serve Somebody” nuk kanë asnjë lidhje me ritmet shurdhuese të muzikës tallava të Ramës, megjithatë skena e krijuar të kujton mesazhin e autorit që duket se ka gjetur një të vërtetë absolute:
S’ka rëndësi pozicioni jot në shoqëri, në fund të ditës duhet ti shërbesh dikujt! “Mund të jetë Zoti, mund të jetë Djalli”, thotë kantautori. Por mund të jetë dhe … Edi Rama.
“Ka marrë rrugën e djallit”, tha për të Sali Berisha këtë të martë gjatë një takimi në Shkodër. Të njëjtin, një nga ministret e tij e ka cilësuar një “Zeus” në perspektivë.
Kthehemi te takimi në Korçë. Siç e ka bërë zakon, pas sulmeve ndaj opozitës, e tanimë dhe këshillës ndaj grave për ti mbyllur në shtëpi ditën e zgjedhjeve burrat që Ramën nuk e konsiderojnë aq burrë sa ti japin votën, e përfundoi takimin me kërcim kolektiv në ritme tallavaje.
Rama nisi të tundej i vetëm, dhe kur e pa që askujt prej tyre që ishin në radhën e parë të sallës ku zhvillohej takimi s’u pëlqente të bënin si ai, u dha urdhër ti bashkoheshin.
“Ore Sotiraq, kërce Sotiraq, je shumë i ngrirë, Sotira, kërce”, e urdhëroi Rama kryebashkiakun e Korçës Sotiraq Filo. Komandën vokale e shoqëroi dhe me gjeste.
Sotiraqi, dukshëm në siklet, u detyrua ti bindej. U pozicionua në të majtë të shefit dhe nisi të tundej. Lëvizjet megjithatë lanë të pakënaqur liderin, i cili me gjestikulaturë dukej sikur u thoshte të tjerëve: Po ça është ky?!
Sotiraqi u kuptua se nga tallavaja s’ja thoshte fare, megjithatë u detyrua nga belaja të bënte disa lëvizje të sforcuara.
Rama, në këtë moment, i bezdisur nga shija e hidhur që i la performanca e Sotiraqit, vendosi të urdhërojë dhe kryebashkiakun e Ersekës Erion Isai të kërcejë tallava bashkë me të:
“Gishto, hajde gishto, hajde gishto, gishto, hajde”, iu drejtua.
Isai, i mësuar ndoshta me improvizime më shumë se Sotiraqi për shkak të zanatit si humorist, u shfaq më i zhdërvjellët.
Rama megjithatë nuk u ndal me kaq. Donte që të kërcenin dhe të tjerët. Kështu i urdhëroi me emra ti bashkoheshin ata të radhës së parë, mes tyre dhe kryediplomaten e vendit Olta Xhaçka:
“Olta, hajde Olta lërë diplomacinë”.
I shkoi pas dhe Olta, e cila e përqafuar nga “Gishtoja” nisi po ashtu të tundet nën tingujt e tallavasë. Sikleti edhe asaj i shquhej në fytyrë, megjithatë shpura duket se është mësuar: Nuk ka rëndësi je kandidat për këshilltar, kryebashkiak, apo ministër, Ramës duhet ti bindesh!
*Boldnews.al
