Uji i pijshëm për 24 orë në rubinetët dhe çezmat e banesave të banorëve të kryeqytetit ishte një nga premtimet kryesore të Erion Veliajt në 2015 kur u mzgjodh për herë të parë kryetar bashkie në Tiranë, por edhe në zgjedhjet monopartiake të 2019.
Edhe pse sipas bashkisë së Tiranës pjesa më e madhe e kryeqytetit ka ujë të pijshëm, raportet dhe denoncimet e qytetarëve tregojnë të kundërtën, pasi të gjithë e paguajnë dyfish ujin, pasi ai që rrjedh në çezma nuk mund të konsumohet e as të përdoret për gatim.
Ndërkohë, në rrugët e Tiranës çdo ditë mund të hasësh autobotet që shesin ujë dhe qytetarë me bidona në krah që presin të furnizohen prej tyre.
Këtë problematikë e ka konstatuar edhe kandidatja për Këshillin Bashkiak të Tiranës me koalicion “Bashkë Fitojmë”, Floida Kërpaçi, teksa në rrjetet sociale ka shpërndarë foto që tregojnë realitetin e vuajtjes së përditshme për të siguruar ujin e pijshëm në kryeqytet.
Fotot janë realizuar në rrugën “Hamdi Cullhaj” në Misto Mame, aty ku Erion Veliaj pretendon se ka transformuar bllokun me investime në rrugë, kanalizime dhe tubacionet e ujit të pijshëm.
“Live nga rruga Hamdi Cullhaj në Misto Mame. Qytetarët mbushin bidonat me ujë të pijshëm, sepse ujë 24 orë siç ka premtuar ai që paguajnë si kryetar bashkie, nuk ka! Ky kamion me ujë, është dëshmia më e qartë e premtimit të pambajtur për furnizimin me ujë të pijshëm 24 orë. 14 Maji dita e fitores së qytetarëve!”, shkruan Kërpaçi.
