Një grabitje prej 1 milion eurosh është realizuar në një prej argjendarive më luksoze të Parisit, ku janë marrë prej autorëve bizhuteri tepër të veçanta.
Grabitja ka ndodhur në argjendarinë e ndodhur në sheshin “Vandom”. Sipas mediave francize në objekt hynë tre grabitës, të cilët kishin shkuar në vendngjarje me motoçikleta.
Dy prej tyre ishin të armatosur dhe lënduan gjatë grabitjes edhe punonjësin e sigurimit.
Ndërkohë, në videot e publikuara në mediat sociale, shiheshin dy motoçikleta të zeza të ndalura para argjendarisë ndërsa një person i veshur me të zeza dhe me kasketë në kokë, bënte roje.
Pas grabitjes, të tre autorët janë larguar me shpejtësi, ndërkohë që policia u vendos në kërkim të tyre.
Mediat franceze shkruajnë se një nga autorët e grabitjes ishte plagosur në këmbë nga policia, në largim e sipër, ndërsa dy të tjerët janë arrestuar më vonë.
I njëjti dyqan, është grabitur edhe në vitin 2021, me dëmet që në atë kohë u përllogaritën në vlerë rreth 10 milionë euro.
