Policia prej dy ditësh ka identifikuar Ruben Saraiva, portugezi që akuzohet se ka ekzekutuar biznesmenin Ardian Nikualj në ambientet e lokalit të tij në Shëngjin.
Gjatë intervistave për mikrofonin e “News24”, banorët e fshatit Kakarriq kanë bërë me dije se rreth 2 muaj e gjysmë se i riu portugez lëvizte lirshëm në zonë. Ata pohuan se për gati 2 muaj e gjysmë portugezi ka jetuar në banesën e Edmond Haxhisë, i cili dyshohet se është porositësi i vrasjes së biznesmenit në Shëngjin, ngjarje që ndodhi më 19 prill.
“Shtetasi portugez prej dy muajsh kishte ardhur në fshatin Kakarriq dhe lëvizte i lirë. Në fillim u raportua se jetonte me qira në këtë fshat, por banorët thanë se në këtë fshat nuk ka banesa me qira. Shtetasi portugez ka jetuar në banesën e Edmond Haxhisë, por herë pas here shkonte dhe në Shkodër. Pasi kishte kaluar pak kohë, kishte nisur të mësonte në gjuhën shqipe dhe përshëndeste në shqip. Lëvizte me veturë dhe motor, pikërisht me motorin që përdori për të kryer krimin. Ai motor është përdorur herë pas here nga 27-vjeçari”, pohojnë jashtë kamerave dëshmitarët e fshatit.
