Kreu i “Lëvizja Bashkë” Arlind Qori ka treguar në emisionin “Opinion” arsyen pse vendosi të kandidojë për bashkinë e Tiranës më 14 maj.
Qori ka thënë se qëllimi i tij kryesor pse garon në zgjedhje është për të ndryshuar Tirana e më pas Shqipëria, duke e cilësuar gjendjen aktuale të vendit si një “xhungël”.
–Qori pse kandidat për bashkinë e Tiranës? Ju e dini që shanset reale tuajat për të fituar bashkinë e Tiranës janë të vogla, për të mos thënë inekzistente në raport me dy konkurrentët kryesorë.
Arlind Qori: Sa herë ma thonë këtë gjë, unë ju bëj pyetjen: Ku e dini ju? Ku i dini ju shanset tona? Ne garojmë për herë të parë, kemi një përvojë të gjatë politike si aktivistë…
-Ka sondazhe, ka një perceptim publik domethënë ne nuk jemi ‘out’ fare kur e bëjmë këtë pyetje.
Arlind Qori: Sondazhet që regjistrojnë preferencën e qytetarëve për parti si “Lëvizja Bashkë” janë tejet të pasakta. Unë do t’i referohem “Europian Social Survey” i cili kur bën sondazhe për Shqipërinë, vendos një x aty dhe thotë ky është një vend shumë problematik për sondazhe dhe zakonisht është i vetmi vend i Europës kur sondazhet nuk regjistrojnë gjithçka. Në 10 vetë që na premtojnë mbështetje ne sot, 9 refuzojnë të dalin në foto. Kur takojmë qindra veta përditë…
-Je i sigurt që ata të ofrojnë vetëm ty mbështetjen se unë kam informacion se të njëjtit njerëz në 2021-in dilnin dhe në mitingjet e Ramës dhe të Bashës.
Arlind Qori: Ama unë e di se mua dhe “Lëvizjen Bashkë” nuk kanë pse të na gënjejnë sepse ne nuk premtojmë në terma si vend pune, favore dhe nuk kanë pse të ndihen të kërcënuar nga ne. Ne hyjmë në garë për të fituar mbështetjen e shumicës dërrmuese të shoqërisë, se sa do të fitojmë do ta shohim. Ne duam të ndryshojmë Tiranën sot, duam të ndryshojmë Shqipërinë nesër, ne duam të tregojmë se Tirana dhe Shqipëria janë pak a shumë kjo që treguat pak më herët, një vend ‘xhungël’, ku njeriu për njeriun është ujk. Britanikët na vrasin kur ne harrojmë të vrasim njëri-tjetrin.
Ne përdite rrihemi dhe vritemi me njëri-tjetrin, edhe në rrugë, edhe në trafik. Edhe kjo vjen si rezultat i një stresi të madh dhe tensioni që ne nuk e shfaqim ndaj atyre që na kanë sunduar e poshtëruar, por e shfaqim ndaj njëri-tjetrit. Ne na kanë bërë ujqër të njëri-tjetrit. Mënyra si e shoh unë kryetarllëkun është jo vetëm privilegj, por edhe sakrificë edhe guxim. Po lexoja pak më parë një libër të Luftës së Dytë Botërore dhe e di si i kalonin ushtarët fushat e minuara, ngarkonin një kafshë pune që të ecte në fushë, në këtë kuptim unë mendoj që kryetari i një partie është ajo kafsha e punës që ec në një fushë të minuar, e në këtë fushë të minuar o eci unë, ose nuk ecën askush në “Lëvizjen Bashkë”! Të ishte për vend komod do e kisha vënë veten në këshill bashkiak.”
