Presionet dhe kërcënimet për qytetarët që do të votojnë opozitën në zgjedhjet lokale të 14 majit, të cilat i nisi në Kamëz, kryeministri Edi Rama i vazhdoi në turin e takimeve në qarkun Fier dhe pas mbledhjes së Kryesisë së PS.
Nga paralajmërimi anti-kushtetues se qeveria qendrore nuk do të financojë kryebashkiakë të djathtë që fitojnë zgjedhjet më 14 Maj, Rama kaloi sot te kërcënimi se nuk do të njohë votën e shqiptarëve nëse ata votojnë për opozitën.
“Nuk kam folur për kandidatë kundërshtarë, kam folur për kukulla të një çifti ku kemi një non grata të shpallur nga SHBA. Ky nuk është presion por mënyrë për t’ia thënë drejtpërdrejtë njerëzve se do jetë i pamundur bashkëpunimi, por sepse këta kandidatë nuk janë vënë aty për të zgjidhur hallet e komunitetit por për ngritur barrikada të luftës politike”, tha Rama.
Kjo formë e qasjes ndaj rezultatit të mundshëm të 14 majit nga ana e Ramës, për Sali Berishën tregon se kryeministri po e ndien fundin politik.
Sali Berisha iu përgjigj sot deklaratave të kryeministrit për ndrëprejen e financimeve dhe bashkëpunimit, duke thënë se pas zgjedhjeve vendore, Ramës s’do i mbetet më kohë për të bashkëpunuar me njeri, pasi do të dorëzojë pushtetin.
“Edi Rama të duket se është në lojë e fundit të tij politike dhe ka mbyllur cdo lloj transparence. E pret fundi që meriton. Pas 14 majit Rama, në këtë rast po thotë të vërtetën nuk do i mbetet kohë të bashkëpunojë me njeri përveçse të dorëzojë pushtetin e të shkojë në punët e tij. Ky është fundi Rama po ndjen, po e kupton”, tha Berisha.
Lideri i opozitës gjithashtu ka sfiduar kryeministrin Rama në debat televiziv, duke i kërkuar ballafaqim për tenderat abuziv që i ka dhënë familjes dhe klientëve të PS. Berisha deklaroi se nëse ata përballen në debat ai do t’ia numërojë të gjitha vjedhjet dhe aferat që ka bërë.
“Njeriu që vrau ballafaqimin në studio është Edi Rama. Atij nuk ja mban të ballafaqohet me Sali Berishën, sepse e di si del në ata ballafaqim. Atij nuk ia mban të vijë në studio dhe t’ja rreshtoj një nga një të gjitha vjedhjet e mëdha, veprat e rënda penale që ka kryer për kontratat që ka firmosur për xhepin e tij.
Atij nuk ja mban të vijë në studio dhe t’ia numëroj një nga një të gjitha vendimet me të cilën po e gjobit Shqipërinë në Gjykatat Ndërkombëtare. Në gjoba që do arrijnë në 1.6 mld minimumi deri më sot.
Atij nuk ja mban të vijë dhe t’ia rendis të gjitha tenderat dhe aferat e familjes së tij, vëllait, të thjeshtrës, të ministrit të familjes, të baxhanakut e me radhë. Nuk ja mban”, deklaroi Berisha.
Një apel, Berisha e kishte edhe për mediat, që të mos ftojnë në studiot televizive ata kandidatë që nuk pranojnë ballafaqim.
“Jam këtu gjithashtu për tu bërë thirrje mediave, të mos pranojnë në studio asnjë kandidat për qeveritarë vendorë që refuzojnë ballafaqimin me kundërshtarin. Ballafaqimi është detyrim moral para qytetarëve. Ky ballafaqim jo vetëm që nuk ka njohur zhvillime pozitive, por është zhdukur nga ekranet tona. Unë i bëj thirrje mediave të mos pranojnë asnjë njeri në studio që nuk është i gatshëm për ballafaqim.
Unë e kuptoj se kjo fillimisht do ketë ndikim në aktivitetin e studiove, por kjo do ti nderojë dhe do ti lartësojë. Studiot me këtë qëndrojnë së pari në anën e publikut dhe qytetarit dhe në anën e profesionit të tyre”, nënvizoi Berisha.
