Kandidati i koalicionit ‘Bashkë Fitojmë’ për Bashkinë e Tiranës, Belind Këlliçi është vendosur në qendër të kritikave pasi së fundmi publikoi një poster elektoral teksa shfaqej i revoltuar duke i drejtuar “gishtin e mesit” korrupsionit galopant që ka përfshirë pushtetin lokal.
Pasi u kritikua për mungesë etike, Këlliçi 24 orë më pas ndryshon posterin duke zgjedhur një slogran të ri këtë herë ka bërë duart e tij në formën e strehës së shtëpisë.
“Duart e Belos do të ulin koston e jetesës në Tiranë. Nuk të duhet fytyra e tij, por vullneti që ka”, shkruhet në mesazhin e posterit të Këlliçit.
Belind Këlliçi u shpreh se nëse zgjidhet në krye të Bashkisë së Tiranës do të luftojë korrupsionin dhe të ardhurat të cilat do të mblidhen do i investojë për shërbimet publike për qytetarët dhe në një nga banerat e kësaj fushate Këlliçi ka vendosur që t’i tregojë gishtin e mesit korrupsionit.
“Kam një mesazh për këdo që abuzon me taksat e qytetarëve të Tiranës”, shkroi Këlliçi.
Por ky poster prodhoi reagime pro dhe kundër strategjisë që ka zgjedhur. Të parat kanë reaguar Xhamitë e Tiranës dhe më pas Aleanca kundër Gjuhës së Urrejtjes, e cila i bëri kërkesë zyrtare në KQZ dhe Ilirjan Celibashi urdhëroi heqjen e banderolave me gjuhë fyese.
Ndërkohë, analisti dhe Zëdhënësi i Rithemelimit Alfred Lela, tha se posti i Belind Këlliçit me gishtat drejtuar korrupsionit është simbolikë politike, guxim politik dhe mënyrë e të thënit.
