Një valë e paprecedentë të nxehti do të godasë Spanjën këtë javë, me temperatura të larta që pritet të arrijnë në rajone të caktuara si Andaluzia deri në 40 gradë Celsius.
Vendi po përballet me një thatësirë të zgjatur me pasoja shkatërruese për bujqësinë, ndërsa temperaturat do të jenë jashtëzakonisht të larta për këtë periudhë të vitit duke nisur nga ditët në vijim.
Sipas një deklarate të shërbimit meteorologjik spanjoll (Aemet) kjo valë e nxehtë lidhet me një masë ajri shumë të ngrohtë dhe të thatë që vjen nga Afrika në Gadishullin Iberik dhe Ishujt Balearik.
Ajo do të arrijë kulmin në fund të javës në pjesën jugore të vendit, sqaroi shërbimi publik.
Sipas Aemet, temperaturat do të arrijnë 30 gradë celsius ditën e sotme dhe të nesërme në pjesën më të madhe Jugut të vendit, me temperatura të larta të mundshme deri në 35 gradë Celsius në Andaluzi, si dhe në rajonet e Valencias dhe Murcias, në bregdetin e Mesdheut.
Temperaturat më pas do të vazhdojnë të rriten për të arritur përgjithësisht 35 gradë të enjten dhe të premten në gjysmën jugore të vendit dhe në luginën e Ebras në veri-lindje të Spanjës, apo deri në 40 gradë në luginën e Guadalquivir, Andaluzi.
“Temperaturat këtë javë do të kalojnë mesataren normale për sezonin nga 6 deri në 10 gradë Celsius. Sidoqoftë, në disa vende, ato madje do të tejkalojnë vlerat normale 15 deri në 20 gradë për fundin e prillit”, tha zëdhënësi i agjencisë “Aemet”, Ruben del Campo.
Vala e të nxehtit vjen pasi Spanja po përjeton një valë jonormale të të nxehtit pranveror dhe thatësirë, veçanërisht në Katalonjë, në verilindje, e cila po përballet me thatësirën më të keqe në dekada dhe autoritetet kanë marrë tashmë masa për të kufizuar përdorimin e ujit.
Në mungesë të shiut, rezervuarët e ujit – të cilët ruajnë ujin e shiut për t’u përdorur në muajt më të thatë janë vetëm në ¼ e kapacitetit të tyre në rajon.
