Kryeministri Edi Rama ka zhvilluar sot një takim me qytetarët në Durrës, duke u ndalur edhe tek pagat e punonjësve.
Megjithëse shpopullimi i Shqipërisë është në nivel alarmant, kjo nuk e shqetëson kryeministrin Edi Rama i cili ka pranuar se nuk mund t’i kërkojë emigrantëve që të kthehen në vendin e tyre.
“Kemi hyrë në një kohë lufte për mish njeriu. Vendet e zhvilluara do të bëjnë çmos të thithin sa më shumë njerëz. Nuk ka. Ndaj ne duhet që jo vetëm të mos humbim krah pune më shumë, por duhet të kthejmë pas edhe ata që kanë ikur. Por ne sot nuk jemi në fazën që t’u themi shqiptarëve që janë jashtë, kthehuni sepse ja vlen.
Por ata që e kanë pasur një siguri këtu është ndryshe. Historia që të gjithë duan të punojnë në shtet, ka aspektin e mungesës së informacionit, apo të marr një pagë të mirë, edhe në zyrë luaj letra në kompjuter dhe të dal ke kafja. Ne pagat minimale do t’i rrisim, por nuk është kjo çështja”, tha Rama.
700 mijë shtetas janë larguar nga Shqipëria
Që nga viti 2008 deri në 2020-n, janë rreth 700 mijë shtetas shqiptarë që kanë marrë leje qëndrimi në një nga shtetet e Bashkimit Europian. Shifrat janë bërë të ditura nga Eurostat, instituti europian i statistikave dhe janë përpunuar nga “Monitor”.
Numri më i lartë i lejeve të qëndrimit është dhënë në periudhën 2008-2009, me përkatësisht 97.3 mijë dhe 83.9 mijë, si rrjedhojë e emigracionit të lartë të fillim viteve 2000. Më pas fluksi erdhi në rënie, duke zbritur në rreth 30 mijë në vitin 2013. Pas kësaj periudhe, rigjallërimi i ciklit të emigracionit, që tregohet dhe nga shtimi i ndjeshëm i kërkesave për azil solli një tjetër rritje të lejeve të qëndrimit, që kulmoi në vitin 2019, me rreth 60.4 mijë të tilla.
Në krahasim me vendet e tjera të rajonit, Shqipëria mban rekordin për numrin e shtetasve të saj që kanë zgjedhur të jetojnë e punojnë në një shtet të Bashkimit Europian.
