Shqipëria u fut zyrtarisht sot në muajin e fushatës elektorale, teksa ethet për verdiktin e 14 majit të shprehur me votë nga shqiptarët shtohen në kampin e çdo kandidati.
Gjatë kësaj kohe para nisjes së fushatës disa sondazhe janë publikuar nga televizionet në vend, për të cilat lideri i opozitës Sali Berisha është shprehur sot në konferencën me gazetarët se janë të manipuluara nga qeveria.
Berisha denoncoi publikisht kryeministrin Edi Rama duke thënë se ka falsifikuar rezultatet e sondazheve dhe i ka paguar kompanitë që merren me këto polle nga 1 milion euro secilës.
Lideri opozitar gjithashtu nënvizoi se kandidatët e koalicionit ‘Bashkë Fitojmë’ janë në ngjitje vertikale dhe këtë e tregon mbështetja masive për figura si Luçiano Boçi dhe Igli Cara.
“Së pari dëshiroj t’u drejtoj një thirrje të gjithë demokratëve të Shqipërisë, mbështetësve të PD-së, por edhe të gjithë qytetarëve të Tiranës dhe mbarë Shqipërisë, të vijnë nesër në festën e hapjes së fushatës elektorale të koalicionit ‘Bashkë Fitojmë’. Kjo fushatë karakterizohet nga një frymë e shkëlqyer optimizmi dhe besimi në fitore e njëjtë me atë të vitit 1992. Ka një situatë të elektrizuar, të cilën unë e kam përjetuar në pranverën e 92-shit. Ka disa ngjashmëri të tjera. Më kujtohet si sot kur kompania më prestigjoze e botës në atë kohë, ose të paktën që dija unë që ishte Gallup, nxori Partinë e Punës 22 pikë para PD, në një kohë kur në 22 mars, partia e Punës së Shqipërisë me emër të ri doli me 22%. Gallup, një kompani shumë serioze mori një vendim; asnjë poll më në Shqipëri. Deri më sot s’ka bërë asnjë poll. Ajo që ka bërë poll është Gallup bullgaria. Çfarë po ndodh sot? Nuk besoj se Gallup në atë kohë i mashtroi me qëllim shifrat, por antena lokale që kishte përzgjedhur e mashtroi në mënyrë të paskrupullt atë. Edi Rama iu ka dhënë kompanive të polle-ve 1 mln euro secilës për të falsifikuar rezultatet e polle-ve. Kjo është e vërteta. Por sot për fat të mirë e vërteta është se përsëri në këtë falsifikim, kandidatët tanë janë në ngjitje vertikale”, tha Berisha.
