Komisioni Qendror i Zgjedhjeve ditën e djeshme shpërndau fondin e parë për zgjedhjet lokale të 14 majit.
Pa dyshim që më i fituari me “tortën” më të madhe doli Enkelejd Alibeaj i cili për shkak se “rrëmbeu” vulën e PD-së përfiton nga KQZ-ja rreth 1 milion dollarë. Këto para akordohen me qëllim për të bërë fushatë elektorale por realiteti është krejt i kundërt me “Grupin Alibeaj” të cilët kanë ngelur në minorancë pasi të gjithë kandidatët e propozuar prej tij njëri pas tjetrit po japin dorëheqjen duke parandaluar një dështim të turpshëm në zgjedhjet e 14 majit.
Ky nuk është fondi i fundit pasi PD-së zyrtare pritet ti arkëtohet edhe një pjesë tjetër e fondit e llogaritur sipas zgjedhjeve lokale të 2015-ës sa kohe që opozita nuk mori pjesë në zgjedhjet e 2019-ës. Një shumë kjo aspak e vogël për PD-në e Alibeajt sa kohë që ende vijon rrjedhja e dorëheqjeve nga ata pak kandidatë për kryetarë bashkie që Alibeaj ka depozituar në KQZ.
Pasi “mbushi” xhepin me para nga KQZ-ja, Enkelejd Alibeaj nuk ndihet i shqetësuar që çdo ditë e më shumë po “braktiset” nga kandidatët që ka nxjerrë në disa bashki të vendit.
Gjatë intervistës për Euronews Albania, Alibeaj pranoi që çdo ditë e më shumë po “braktiset” nga demokratët dhe shumë degë të PD-së kanë dalë në mbështetje të kandidatëve të koalicionit të Metës me Berishën “bashkë Fitojmë”.
Alibeaj vijoi duke thënë se zgjedhjet e 14 majit janë një test për qëndrimet e tyre të mbajtura gjatë këtij viti dhe në bazë të rezultatit partia do t’i nënshtrohet një procesi ristrukturimi.
“Ky është një fakt. Dua të bëj të qartë një gjë, ajo që është linja politike e PD është se të gjithë ata deputetët, anëtarë Kryesie, kandidatë, kryetarë degësh, përfaqëses të Këshillave Bashkiakë duhet të kenë një qëndrim të qartë dhe të saktë tek vota dhe mbështetjen e Partisë Demokratike. Ky është rregull statutor i PD-së. Por nëse duam të jemi në një shoqëri të lirë dhe të respektojmë lirinë e individit secili mund të zgjedhë rrugën e vetë, duke bërë përllogaritjet e tij të kostove dhe përfitimeve të qëndrimit politik. Ajo që është e rëndësishme është ajo që do ndodhë me PD pas këtyre zgjedhjeve, për të marrë vlerësimin e qytetarëve në lidhje me qëndrimin që kemi mbajtur deri tani për një vit e gjysmë. Partia Demokratike do të testohet dhe pas 14 majit PD është e detyruar për shkak të statutit dhe të ngjarjeve që të futet në një proces ridimensionimi dhe riorganizmi të kulturës së bëri politikë”, tha Alibeaj.
- Çfarë deklaroi ditën e djeshme Berisha për ndarjen e parave të fushatës?
Komisioni Qendror i Zgjedhjeve miratoi dje shpërndarjen e fondit vjetor prej 345 milion lekë dhënë nga buxheti shtetit për 11 parti politike, ku pjesa më e madhe shkoi për Partinë Socialiste, pasi 74 mandatet u përkthyen në 150 milion lekë.
Ndërkohë sa i përket selisë blu, nga fondi i KQZ do të përfitojë PD e vulës, e drejtuar nga kryetari i komanduar Enkelejd Alibeaj. Lidhur me shpërndarjen e fondeve dhe faktin që paratë do të kalojnë për llogari të grupit Alibeaj, foli për mediat jashtë Kuvendit kryedemokrati Sali Berisha, i cili thekoi se kjo është fytyra e vërtetë e këtij regjimi.
Berisha nuk ka përfituar nga KQZ-ja asnjë lekë për fushatën elektorale megjithëse në realitet zotëron mbështetjen jo vetëm të bazës së Partisë Demokratike por nga i gjithë elektorati demokrat në 61 bashki të vendit.
“Një nga aktet më të turpshme, më të shëmtuara është se mundi, djersi dhe taksat e 620 mijë qytetarëve që votuan PD-në, grabiten nga një grup, pengje të Edi Ramës”, u shpreh Berisha.
Sipas kryedemokratit dyshja Alibeaj dhe Basha po përfitojnë fondet e votuesve demokratë edhe pse nuk gëzojnë besimin e tyre për të drejtuar PD.
“Jo pak, por janë 2 milionë dollarë, 1 milionë dollarë është vetëm fushata. Përfaqësuesit e 620 mijë votuesve nuk marrin asnjë qindarkë. Kjo tregon fytyrën e shëmtuar të këtij regjimi. Ky tregon keqpërdorimin e dyshes famëkeqe Alibasha-Brava”, theksoi ai.
Më tej, Berisha nënvizoi se do të njoftojnë për krijimin e një rregulloreje për përballimin e shpenzimeve të fushatës me kontribute vullnetare.
