Nga Boldnews.al
Gledian Llatja vijon “çmendurinë” para zgjedhjeve të 14 majit. Para pak muajsh, redaksia jonë denoncoi sesi bashkia po hapte thesin për shtrimin e rrugëve, ose atë që njihet si asfalti elektoral. Miliona euro po hidheshin në rrugë dhe sheshe, ndërkohë që pasi është hedhur kalldrëm, asfalti po pret fushatën elektorale, teksa në ditët apo javët në vijim do të shohim të gjithë propagandën e Rilindjes për ecejaket dhe me gërshërë në duar.
Po pasi bëri “namin” me asfalt, Llatja i ka kthyer sytë nga kanalet. Por a nuk i ka parë për muaj apo vite me radhë? Tani për zgjedhje i ktheu sytë, apo për t’u mbyllur gojën banorëve? Gjithsesi, duket se në Shqipërinë tonë bëhen punët vetëm për zgjedhje dhe jo gjatë gjithë mandatit. Të gjithë tani kujtohen të bëjnë tendera dhe procedura për punët që lanë rrugëve gjatë gjithë mandatit.
38 ditë para zgjedhjeve lokale të 14 majit, Bashkia e Elbasanit ka hapur një super tender për pastrimin dhe rikonstruksionin e kanaleve në atë bashki. Një procedurë e majme, që vetëm Llatja mund ta shpallte. Sipas dokumenteve që disponon BoldNews.al, Llatja ka firmosur procedurën me objekt “rikonstruksion dhe ndërtim i rrjetit të kanalizimeve të zonave informale, Harmas, pjesërisht Krasta e Vogël, pjesërisht lagjja Dyli Haxhire dhe pjesërisht Lagja Katundi i Ri”.
Autoriteti kontraktues është Shoqëria Rajonale Ujësjellës Kanalizime Elbasan SH.A., ndërkohë që fondi limit është plot 703.790.028 lekë, ose plot 7 milionë euro. Një shumë e majme, pasi me këto para’ do të bëhen kanalizimet kryesore. Një procedurë në kulmin e zgjedhjeve lokale, që bëhet vetëm për vota dhe asgjë tjetër. Nëse nuk e bënë për këto vite që ai është në krye të asaj bashkie, pse pikërisht tani? Ose kujt ia ka premtuar këtë procedurë?
“Asfalt elektoral”, Llatja i Elbasanit shpenzon 1.5 mln euro për mbushjen e gropave!
Raportimi i BoldNews.al për asfaltin elektoral në Elbasan
Para pak javësh, BoldNews.al denoncoi tenderin për asfaltin elektoral në Elbasan, ku Llatja “hapi thesin”. Gledian Llatja akordoi një shumë të majme për të mbushur gropat në rrugë. Nëse deri më tani ai po vegjetonte, duke pritur investime “nga lart”, në vitin elektoral, ai do të mbushë gropat në rrugë dhe sheshe në qytete dhe fshatra. Por, nëse s’i ka bërë deri më tani, përse kujtohet në këtë kohë?! Apo zhvendosja e zyrave të bashkisë e ka çoroditur?
Por, duke pasur një “barrë” të rëndë, pasi është “hija” e paraardhësit, Qazim Sejdini, Llatja e ka pasur tepër të vështirë të drejtojë. Aq më tepër, duke pasur edhe mbështetjen e Taulant Ballës, i cili në shumë raste e ka nxjerrë nga situate.
Sipas dokumenteve që disponon BoldNews.al, Bashkia e Elbasanit ka hapur një tender me objekt “rikonstruksion dhe riasfaltim i gjendjes ekzistuese të rrugëve dhe shesheve në Bashkinë Elbasan”. Por, me sa para do e rregullojë Elbasanin kryetari Gledian Llatja?! Në dokumente thuhet se fondi limit i këtij tenderi është 151.666.667 lekë pa TVSH. Ose me TVSH 1.5 milionë euro. Me këtë shumë, makinat e firmës që do kontraktohet vetëm sa do të qarkullojnë në këto njësi administrative dhe jo më ti rregullojnë.
