Endja prej më shumë se 6 muajsh në zyrat e shtetit dhe protestat e vazhdueshme duke mos marrë asnjë zgjidhe për vlerësimin e pronave të tyre, nuk i kanë lodhur banorët e Bërxullës.
Pasi i lanë 24 orë afat për një përgjigje Dallëndyshe Bicit, ata iu drejtuan paraditen e kësaj të enjte sërish zyrave qendrore të Agjencisë Shtetërore të Kadastrës, duke tentuar të hyjnë brenda, në mënyrë që zëri i tyre të dëgjohet dhe t’i jepet zgjidhje problemit me kompensimin për pronat.
Banorët janë shprehur për mediat se nuk janë kundër ndërtimit të autostradës Thumanë-Kashar, gjurma e së cilës kalon mbi banesat dhe tokat e tyre, por kërkojnë që procesi i shpronësimeve të jetë i drejtë dhe me vlerën e tregut.
“Është bërë aplikim që në 2015 për legalizim dhe nuk ia bëjnë legalizimin e banesës. Çfarë duhet të kërkojmë ne? I kujt është faji? Na thoni shkoni bëni edhe një herë aplikime. Këto nuk luajnë dot nga zyrat. Të gjithë dokumentet që vijnë në këtë hipotekë nuk kanë një dosje. Këto punojnë ‘kap ca të kapësh’ dhe pa dhënë ryshfetin nuk të mbarojnë punë. Ne nuk tërhiqemi se letra që thonë këta se nuk certifikohen prona se ka dalë vija e kuqe, e kanë nxjerrë në tetor. T’i japin shpjegim banorëve në terren se s’do kenë hall e derman pa i certifikuar pronat. Çdo ditë po na e sosin durimin me paligjshmërinë që bëjnë. Këto janë sikur nuk kanë parë ndonjëherë diell me sy. Unë të kam sjellë planin. Këtij mileti po i bëhen sorollatje veç që të mos bëjnë punën”, tha njëri prej banorëve.
Sipas tyre, kompania “Gener 2” që ka fituar koncesionin me vlerë 1.3 miliardë euro, ka nisur punën në terren por dëmshpërblimi i ofruar është qesharak.
Para zyrave të Kadastrës, banorët shprehen se po i soset durimi me paligjshmërinë që po i bëhet dhe akuzojnë zyrtarët e Kadastrës se nuk bëjnë asnjë veprim për legalizime pa ryshfet.
“Këtu pa dhënë ryshfetin nuk mbaron punë. U bëj thirrje të mos vonohen, por të vijnë të flasin me ne dhe të mbarojmë punë. T’u japin shpjegim banorëve në terren sepse ndryshe nuk do të kenë shpëtim”, ka thënë një prej banorëve”, tha një tjetër banor i Bërxullës.
Ata gjithashtu paralajmërojnë se nuk do t’i shmangin as përplasjet me forcat e policisë në rast se nuk do të arrijnë të marrin përgjigje përmes dialogut.
“Kanë kërkuar një informacion që na thonë na e sillni listën e gjurmës së rrugës. Thonë na e ka sjellë një firma por s’na përputhet. Dinë gjurmën e rrugës, por jo sipërfaqen e tokës. Do hyjmë brenda në Hipotekë. Do përplasemi me forcat e policisë. Kur nuk pranojnë dialog e marrëveshje, do përdorim edhe ne metodat tona. Forca është fundi i logjikës, por nëse këta nuk pranojnë dialog do të hyjmë me forcë”, shprehen banorët.
Duke akuzuar kryeministrin Edi Rama dhe ministren e Infrastrukturës Belinda Balluku si hajdutë dhe të korruptuar, banorët tentuan që të mësyjnë në zyrat e Kadastrës.
Gjithashtu u dëgjuan edhe thirrjet: “Duam pronat tona! Certifikoni pronat tona. Do t’i mbrojmë me gjak. Prona është e shenjtë!”.
Ata hasën në reagimin e menjëhershëm të forcave të rendit dhe oficerëve të sigurisë private para godinës.
“I kanë bërë zyrat si bunkerë, si në kohën e Enver Hoxhës. Këtu është brenda kryeministri, ministrja Balluku, të gjithë hajdutë, ministri i Drejtësisë. Kjo është kupola e hajdutëve, mbroni hajdutët. Turp të kini, turp, turp. Ne vijmë si njerëz, kurse këta si skutha që nuk kanë parë diell me sy. Këto janë sorollatja që i bëhen popullit që mos na bëjnë punë, kjo bëhet për të vjedhur”, tha njëri prej banorëve, pasi nuk u lejuan të hyjnë në godinë për të diskutuar për një zgjidhje me titullarët.
LEXO EDHE:
Banorët e Bërxullës përplasen me policinë, tentojnë të futen brenda Hipotekës: Kriminelë!
