Një tjetër banor i Bërxullës i ka bërë thirrje drejtoreshës së Hipotekës, Dallëndyshe Bicit që të nxjerrë në terren një grup pune që të vlerësojë pronat e tyre.
Ai tha se banorët e kësaj njësie po sorollaten nëpër institucione, kurse qeveria hesht nga kjo “grabitje” që po u bëhet pronës së tyre.
“Dallëndyshe Bici të ngrejë një grup që të dalë në terren dhe të bëjë matjet dhe certifikimin e pronave faktike. Sipas informimi tim populli i Berxullës vjen vërdallë sa nga një bashki në një tjetër apo në Këshillin e Qarkut. Kanë përplasje me AMPT-në.”, tha banori i Berxulles.
Ndërkohë një tjetër banor tha se këtë çështje do e ndjekë në SPAK, e deri në Strasburg.
“Nuk ka det e oqean që të lajë mëkatet e tyre ndaj nesh. Jam i mendimit se sot, nëse s’na jep përgjigje ajo (Bici) do i drejtohemi SPAK-ut, prokurorisë, deri në Strasburg. Në këmbë do nisem deri në Strasburg.”, tha ai.
- Banorët e Bërxullës protestojne prej 6 muajsh
Banorët e Bërxullës prej 6 muajsh kundërshtojnë projektin e zgjerimit të aksit rrugor ‘Thumanë-Kashar’ i cili prek banesat e tyre. Kjo nuk është protesta e parë që ndodh nga banorët e kësaj zonë lidhur me këtë shqetësim, pasi ata nuk janë dakord me skemën e shpronësimit të pronave të tyre që preken nga projekti i rrugës.
Sipas tyre, çmimi i tregut për pronat e tyre është rreth 50 euro për metër katror, ndërsa atyre u është ofruar një kompensim me rreth 4 euro për metër katror, gjë që ata e kanë refuzuar kategorikisht.
Disa herë ata kane paralajmëruan përshkallëzim të protestës nëse kërkesat e tyre nuk marrin përgjigje, ata pohojne se “do ta zgjidhin me vetëgjyqësi”.
