Nga Boldnews.al
Për Erion Veliaj, Bashkia e Tiranës është lider jo vetën në Shqipëri, por edhe në rajon, për fuqizimin e familjeve të reja teksa marrin shtëpinë e tyre të parë me kredi lehtësuese nga fondi i lëvruar prej Ministrisë së Financave dhe institucionit që ai drejton.
Por, disa llogari të thjeshta dëshmojnë se politika sociale e aplikuar nga qeveria dhe Bashkia e Tiranës nuk është aspak miqësore me çiftet e reja.
Një familje e re me të ardhura mesatare ka nevojë më së paku për një apartament 1+1 që të ndërtojë një jetë normale.
Në Programin Social të Strehimit parashikohet se Bashkia e Tiranës, për këtë tip apartamenti, mbështet me kredi të buta në shumën 5.348.220 lekë të reja. Me kursin aktual të këmbimit, kjo shumë është e barabartë me 47.300 euro.
“Boldnews.al” bëri një vëzhgim në faqet e internetit të agjencive imobiliare për çmimet e apartamenteve 1+1 në zonat periferike të Tiranës, pasi në qendër të kryeqytetit blerja e një banese është mollë e ndaluar.
Nga ky vëzhgim rezultoi se shuma e subvencionuar nga qeveria dhe Bashkia e Tiranës është tërësisht e pamjaftueshme për blerjen e një apartamenti.
Në zonën e Yzberishtit, apartamentet 1+1 me sipërfaqe nga 60 deri në 70 metra katrorë, variojnë nga 55 mijë euro deri në 69 mijë euro.
Më në periferi, në Kombinat, apartamentet 1+1 variojnë nga 55 mijë deri në 67 mijë euro.
Në ekstremin tjetër të qytetit, në zonën e Freskut, një apartament minimalist për çiftet e reja varion nga 55 mijë deri në 65 mijë euro.
Kryetari i Bashkisë së Tiranës justifikon shndërrimin e qytetit në strukturë gjigande betoni, kullash e pallatesh shumë-katëshe, me nevojën për të mirëpritur banorë të rinj.
Ndërkohë që raporte ndërkombëtare, por edhe ekspertë vendas, kanë ngritur shqetësimin se industria e ndërtimit në Tiranë është një ndër format më të mundshme për pastrimin e parave.
Ky dyshim forcohet më tej, kur vërehet se shumë familje të reja, të cilat kanë të ardhura mesatare ose mbi mesataren e përgjithshme, nuk arrijnë të sigurojnë një apartament, për shkak edhe të kredive të buta të pamjaftueshme që lëvrohen nga bashkia e Tiranës.
