Shtyrja e sfidës së djeshme të Kategorisë Superiore midis Kastriotit dhe Bylisit, e planifikuar të luhej në orën 15:00, pas një njoftimi të FSHF-së se gjyqtarët e ndeshjes kishin marrë kërcënime për jetën ishte skandali i radhës, dhe tepër tronditës për futbollin shqiptar.
Federata pretendon se gjyqtarët janë kërcënuar përpara kësaj sfide dhe asnjëri s’ka preferuar ta marrë përsipër gjykimin e saj, ndërsa ky ishte rasti i dytë i rëndë, ku institucioni në fjalë denoncon për kërcënime arbitrash.
Kjo pasi, një javë më parë, në ndeshjen Kastrioti-Laçi arbitrat e ndeshjes po ashtu janë kërcënuar me jetë dhe janë detyruar të anulojnë një gol për skuadrën kurbinase.
Dy episode të tilla që tregojnë pasigurinë e gjyqtarëve në futbollin shqiptar, duket se kanë vendosur FSHF me shpatulla pas murit, duke dalë hapur dhe kallëzuar në polici rastet.
Referuar rastit të djeshëm, sipas “Panorama Sport”, gjyqtari i sfidës Kastrioti-Bylis do të ishte ndërkombëtari Juxhin Xhaja.
Gjyqtari është njoftuar të shtunën në mbrëmje vonë nga FSHF-ja për ndeshjen, por të dielën paradite ka marrë telefonata të çuditshme.
Duke e ndierë rrezikun, për shkak edhe të një eksperience të gjatë në arbitrim, kryesori Xhaja nuk ka preferuar t’u përgjigjet telefonatave që i vinin nga numra të panjohur.
Mirëpo kërcënuesit nuk janë mjaftuar me kaq, pasi kanë kërcënuar me jetë edhe familjarët e arbitrit.
Situata është bërë shqetësuese, pasi mësohet se bashkëshortja e gjyqtarit është shtatzënë dhe pavarësisht se kërcënimet nuk kanë qenë në adresë të saj, Xhaja ka bërë kallëzim në polici i alarmuar nga situata.
