“Asfalti elektoral” është një fenomen që shfaqet rëndom sa herë ka zgjedhje në Shqipëri. Drejtuesit e bashkive nxitojnë të shtrojnë rrugët me synimin për të thithur votat e qytetarëve.
Kjo po bëhet masivisht në Tiranë këto ditë, por edhe qytete të tjera. Për mediat, qytetarët kanë artikuluar se fenomeni është shqetësues, jo për faktin se rrugët shtrohen, por sepse punohet rishtas e në mënyrë jo cilësore dhe se pushteti vendor kujtohet për këto ndërhyrje në infrastukturën rrugore vetëm para zgjedhjeve.
Arnimi i gropave në rrugë vetëm në këtë periudhë është një politikë e gabuar për shumëkënd, megjithatë përfaqësuesit e mazhorancës e konsiderojnë normale.
Një qëndrim të tillë shfaqi këtë të Hënë Sekretari i Përgjithshëm i Partisë Socialiste, Damian Gjiknuri.
Teksa u pyet për fenomenin në një emision televiziv, ai u rrek ta paraqiste si normale, ndërsa u shpreh se tani “është stina e ziftit”.
Pjesë nga diskutimi në emisionin të Paekspozuarit mes Gjiknurit dhe gazetarëve të ftuar në studio:
Ylli Rakipi: Zifti ka plasur keq gjithandej. Po dole në Tiranë…
Damian Gjiknuri: Tani është stina e ziftit Ylli…
Ylli Rakipi: Kush nuk ka lekë të pijë alkool, dalin jashtë dhe i “zë” zifti… Siç ka disa politikanë që i zë libri, ka dhe në opozitë….
Damian Gjiknuri: Ore ai bën punë aty…
Enton Abilekaj: Me taksat e mia punohet për të bërë propagandë. Ka tetë vjet kryetar bashkie, pse se ka shtruar rrugën ai?
Damian Gjiknuri: I erdhi radha pra.
Enton Abilekaj: Në fushatë elektorale? Është asfalt elektoral. Ky është vendi i betoniereve.
Damian Gjiknuri: Politikani punon për katër vjet për këtë.
Enton Abilekaj: E patë atë foton, ku ishte shtruar me shpejtësi dhe kishte mbetur një copëz ku ishte parkuar makina?
Ylli Rakipi: Këta e gjetën justifikimin, që zifti hidhet në pranverë…
Neritan Sejamini: Gjithë këto punë publike nuk kanë asnjë standard. Mënyra si bëhet shpejt e shpejt, nuk ka lidhje as me standardet. Ajo ngutje, hidh me lopatë…
Damian Gjiknuri: Ju do të gjeni kritikë për çdo gjë. Edhe kur bëri dasëm të mirë njëri, thanë bëri dasëm të mirë qeni…
Enton Abilekaj: Bën fushatë me paratë tona dhe thua mos me pyesni. Këto rrugë të qelbura i quani dasëm të mirë?
Damian Gjiknuri: Ti e ke botëkuptim që çdo gjë që bën qeveria është e keqe.
