Ish-zëdhënësi i Ushtrisë Çlirimtare të Kosovës, Jakup Krasniqi, në fjalën e tij para trupit gjykues, tha se ai “urren dhunën, vrasjen e torturat”, jo sepse ai ka qenë subjekt i dhunës, por sepse “i konsideroj të ulëta”.
“Kushdo që më njeh do t’iu thotë, se unë Jakup Krasniqi, asnjëherë nuk kam qenë i përfshirë në asnjë vrasje, burgosje në asnjë formë të presionit ndaj kujtdo qoftë”, tha ai.
Ai po ashtu tha se nuk e kupton logjikën e aktakuzës së ngritur ndaj tij, duke shtuar se “ndaj popullit tonë është nënshkruar dhunë sistematike”.
Venkateswari Alagendra, avokatja e Jakup Krasniqit, deklaroi se klienti i tij nuk ka pasur pushtet për të kontrolluar luftëtarët dhe se të njëjtit nuk kishin të bënin fare me punën e tij si zëdhënës.
“Ai nuk ka qenë në marrëdhënie hierarikike me autorët fizikë të krimeve, ai nuk kishte aftësi (pushtetin) për të kontrolluar ndonjë luftëtarë, ata ishin larg gjeografikisht dhe nuk ishin fare të lidhur me punën e tij si zëdhënës. Prokuroria parashtron një teori të pabazuar se UCK-ja ishte më e organizuar sesa ishte në fakt e organizuar, provat do të tregojnë që kjo teori është thjeshtë një fantazi”, tha avokatja e Krasniqit.
Sipas saj, prokuroria është bërë pjesë e propagandës kundër UÇK-së.
“Mjafton të them që prokuroria duket sikur është bërë pjesë e propagandës kundër UÇK-së. Duke interpretuar dokumente ndryshe siç ka qenë situata në terren, provat do të tregojnë të kundërtën”, u shpreh ajo.
“Provat do të tregojnë që UCK nuk ka qenë në gjendje ta arrijë nivelin e organizimit që pretendohet nga prokuroria”, tha ajo.
Ajo përmendi edhe kohën pas përfundimit të bombardimeve, duke thënë se situata ishte kaotike.
“Pas bombardimit të NATO-së, qindra e mijëra civiilë u kthyen në Kosovë, për të gjetur anëtarët e familjes së vdekur, shtëpinë e djegura, ndërkohë pronat etyre dhe kafshët ishin shkatërruar”, tha ajo.
Ajo ritheksoi se “provat do të tregojnë që s’ka pasur zingjir vertikal komande”.
“Bëhet fjalë për një mësues e historian, jo një ushtarak profesionist”, tha ajo për Krasniqin.
