Kryeministri Edi Rama vijon me premtimet për rritje pagash, të cilat opozita i cilëson “pilula elektorale”.
Këtë të Martë, piketoi mësuesit.
“Kemi bërë një plan me dy hapa i cili do të nisë tani dhe do të përmbyllet në vitin e ardhshëm në mënyrë që të realizojmë këtë rritje. Ju e dini shumë mirë që për mësuesit, ishte parashikuar edhe për mjekët, rritja 7%, kështu që do të bëjmë rritjen 7% dhe pastaj në hapin tjetër dhe ky nuk është premtim, por plan financiar, në hapin tjetër pra vitin e ardhshëm, paga juaj do të kapërcejë në një tjetër nivel. Pra, nëse sot që flasim rritja mujore do të jetë midis 3584 për mësuesit e shkollës 9-vjeçare, 3843 për mësuesit e shkollave të mesme dhe deri në 5800 për drejtuesit. Tek rritja e përgjithshme, mësuesit në shkollat 9 vjeçare do të kenë një pagë 95 550 lekë, mësuesit në shkollat e mesme do kenë një pagë 106 800 lekë. Sigurisht këto janë bazat dhe pastaj ka sipas vjetërsisë, kualifikimeve që variojnë, por ky është niveli i pagës së mësuesve”, tha kreu i qeverisë.
Kjo vjen pas të ashtuquajturës “Pako e Madhe” dhe shpërblimit në masën 5 mijë lekë për pensionistët, vendim i miratuar nga qeveria Rama javën e kaluar.
Për opozitën por jo vetëm, shpërblimet dhe premtimet për rritje pagash para zgjedhjeve bëhen për efekt tërësisht elektoral.
Një tjetër pretendim i ngritur nga opozita dhe ekspertë të fushës është ai i shkeljes së Kodit Elektoral nga qeveria, me shpërblimet para zgjedhjeve. Lidhur me shqetësimet u pyet në një konferencë për gazetarët edhe kreu i KQZ-së Ilirjan Celibashi, i cili me përgjigjen e tij, amnistoi në një farë mënyre kryeministrin Rama.
“Ka një përcaktim të qartë në Kodin Zgjedhor, ndalimi ekziston për akte të qeverisë për rastin e zgjedhjeve të përgjithshme për Kuvendin e Shqipërisë”, theksoi ai.
Një tjetër interpretim jep ish-kreu i KQZ-së Kristaq Kume, i cili vlerëson se shpërblimet të tilla para zgjedhjeve si ai për pensionistët janë në shkelje të Kodit Zgjedhor.
“Kodi Zgjedhor thotë se pas zgjedhjeve deri në formimin e qeverisë së re, nuk lejohen këto dispozita, pasi në rastet kur ka ndryshuar mazhoranca, qeveria që ishte në detyrë ka pas marrë vendime që i bënte vetëm në interesin e saj, ndaj kjo ndalohet. Për pasojë, nëse kjo logjikë pranohet, nuk ka rëndësi se çfarë zgjedhjesh zhvillohen”, tha ai në një emisionin televiziv.
