Kreu i Partisë Demokratike, Sali Berisha, deklaroi dje se zotëron dokumentat që vërteton korrupsionin masiv që është kryer përmes incineratorëve ku sipas tij implikohet Rama dhe Veliaj.
Ai tha se këto dokumenta do t’ja dorëzojë kreut të SPAK-ut Altin Dumanit për të hetuar aferën e incineratorëve për të cilën thotë se dyshja Rama-Veliaj kanë vjedhur nga taksapaguesit shqiptar plot 503 milionë euro.
Anëtari i Kryesisë së PD-së, Eno Bozdo, në një intervistë për Rtv Ora tha se Partia Demokratike është e vendosur për të rritur presionin politik mbi Prokurinë e Posaçmë për të mos e lënë në harresë këtë megaaferë.
Bozdo: “Afera e incineratorëve është ndoshta afera më e madhe e kësaj qeverie. Ka për të qenë një gur prove për efiçencën e SPAK, suksesin e reformës në drejtësi dhe dënimin e politikanëve të implikuar në të. Është hajdutëria ose vjedhja më harbute që u është bërë parave dhe fondeve publike me një efekt që shkon deri në 420 milion euro. Sa më shumë prova dhe indicie i ofrohen SPAK aq më i heshtur bëhet sepse këtu fillon implikohen Edi Rama vetë, Ëngjëll Agaçi, ministra të tjerë, njerëz të rëndësishëm të PS.
Mendoj se SPAK i ka vënë kapakun kësaj afere duke u mjaftuar me dënimin e disa peshqve të vegjël, qoftë ky një Ministër por jo fort i rëndësishëm. SPAK ka mbyllur çfarë kishte për të mbyllur me kujdesin më të madh për incineratorin e Fierit dhe Elbasanit. Ndërkohë nuk ka asnjë indicie se çfarë po ndodh me incineratorin e Tiranës ku Veliaj del i përfshirë direkt dhe indirekt. Jo vetëm ai por edhe njerëz të tij të afërt. Duhet ta denoncojmë pa fund dhe të rrisim presionin politik dhe publik mbi SPAK, mbi ndërkombëtarët se reforma në drejtësi është pjellë e tyre dhe për tu treguar shqiptarëve të vërtetën. Kemi vendosmërinë politike për të mos e lënë në harresë këtë çështje kaq të nxehtë“.
Bozdo shtoi se nuk ka asnjë zhvillim në drejtim të aferës së portit të Durrësit, që sipas tij është edhe me e madhe se incineratorët. Bozdo tha se të gjitha këto zhvillime janë provë se reforma në drejtësi jo vetëm nuk funksionon por është një turp i madh.
Bozdo: “SPAK nuk ka më shansin e fundit. Ka mbyllur aferën më të rëndë korruptive. Mesa duket nuk ka për të pasur hetime për incineratorin e Tiranës, SPAK nuk do të hapë hetime për portin e Durrësit por do ta ndjekim deri në fund, SPAK nuk ka ndërmend të thërrasë Edi Ramën për sqarime lidhur me skandalin “McGonigal”. Reforma në drejtësi jo vetëm nuk funksionon por është një turp i madh“.
