Enkelejd Alibeaj po vijon të humbasë dita ditës mbështetjen e deputetëve demokratë.
Enkelejd Alibeaj, mbajtës i vulës së PD-së, thirri në një mbledhje këtë të Premte deputetë demokratë.
Zgjedhjet lokale të 14 Majit ishin në fokus të takimit, që këtë herë ka shënuar një rrudhje të numrit të deputetëve që i janë përgjigjur thirrjes së Alibeajt për mbledhje.
Sipas raportimeve mediatike, vetëm 10 ligjvënës morrën pjesë në mbledhjen e thirrur nga Alibeaj.
Ditët e fundit, disa deputetë demokratë që më herët e mbështesnin janë distancuar nga mbajtësi i vulës së PD-së, ndërsa qëndrimet për dalje në zgjedhje me kandidatë dhe mosmbështetjen në të gjitha bashkitë të atyre të koalicionit “Bashkë Fitojmë”, i kanë dënuar.
Po ashtu, është shënuar një tërheqje e kandidatëve të zgjedhur nga Alibeaj dhe drejtuesit e strukturave të grupit të tij, për të garuar në lokalet e 14 Majit. Pasi kryesia miratoi 16 kandidatura, 6 prej tyre u tërhoqën nga gara, ndërkohë që mbetet e paqartë se sa kandidatë të partisë së vulës janë regjistruar në KZAZ dhe KQZ.
Tërheqje ka pasur po ashtu nga radhët e këshilltarëve.
Deputetët që iu bashkuan mbledhjes së Alibeajt ishin: Gazment Bardhi, Arbi Agalliu, Lefter Gështenja, Flutura Açka, Merita Bakiu, Eralda Tase, Selaudin Jakupllari, Zheni Gjergji, Andi Ulliri, Jorida Tabaku.
Pas mbledhjes, Açka dhe Agalliu iu përgjigjën disa pyetjeve të gazetarëve. E pyetur si e komentoni faktin që PD-ja po përfaqësohet vetëm me 10 kandidatë, Flutura Açka tha: Ju e dini shumë mirë pse, që të mos i përçajmë demokratët deri në fund, ne nuk do të hedhim kripë mbi plagë.
