Megjithëse e gjithë Shqipëria është zhytur në një krizë të thellë ekonomike, varfëri ekstreme, shpopullim masiv i të rinjve, kjo nuk po ndal deputetët “rilindas” të cilët çdo ditë dhe më shumë po tallen me popullin që në fund të ditës nuk siguron dot bukën e gojës për shkak të rritjeve të çmimeve.
Ashtu siç ka denoncuar çdo ditë opozita që pensionet dhe rrogat qëndrojnë në vend numëro, në krahun tjetër qeveritarët firmosin tendera korruptivë miliona euro të cilat u jepen klientëve të tyre.
Në prag të fushatës elektorale të 14 majit, deputeti i Partisë Socialiste Damian Gjiknuri thotë se qeveria ka nisur rritjen e rrogave dhe dhënien e bonusit për pensionistët, ndërsa pranoi se çmimet në vend janë rritur në mënyrë galopante. Megjithatë, Gjiknuri tha nga foltorja e Kuvendit lëshoi një deklaratë tallëse duke thënë se në Shqipëri “nuk vdes njeri për bukë”.
“Plaku i vjetër e di shqetësimin por nuk e sulmon direk, por vë këta kasnecët e vegjël. Ju krijoni kakofoni sepse nuk dini si të reagoni. Vetëm këtë vit janë 10 apo 11 mijë lekë të reja që shkojnë direkt në ekonominë e tyre. Çmimi i energjisë nuk lëvizi këtu asnjëherë. Kjo është masë e pastër sociale, unë jam krenar për qeverinë time. Mos hidhni dokra këtu që Shqipëria qenka vendi i dytë apo i tretë më i shtrenjtë në Europë, këto janë përralla. Vërtet çmimet janë rritur, në Shqipëri siç janë rritur kudo, por prap me këtë minimum të ardhurash nuk vdes njeri për bukë”, deklaroi Gjiknuri.
Edhe ditën e djeshme gjatë një takimi me sipërmarrës kryeministri Edi Rama ka pranuar se Shqipëria ndodhet në një krizë të thellë ekonomike dhe si për gjetur fajtorin tek të tjerët, ai i lëshoi ultimatume biznesit që të rritë pagesat për punonjësit.
