Avokati Adratik Lapaj ka hedhur poshtë propagandën e kryebashkiakut të Tiranës Erion Veliaj me “1 milionë pemët” e mbjella sipas tij gjatë dy mandateve në drejtimin e kryeqytetit.
Pas llogarive të bëra ditën e djeshme ku Lapaj tha se “nëse Veliaj do të kishte mbjellë vërtetë një milionë pemë do të duhej që hapësira nga Korpusi Universitar në drejtim të Bulevardit të Ri e me shtrirje deri në Kamëz të ishte një xhungël”, avokati ka reaguar sërish.
Ditën e sotme, Lapaj ka publikuar një foto ku shihet qyteti i Tiranës dhe me ironi përshkruan se pamjet tregojnë ‘pyllin orbital’, projekt i Bashkisë së Tiranës i nisur vite më parë dhe i cilësuar si strategjik. Lapaj shton me nota humori e ironie se si pasojë e numrit të madh të pemëve, qytetarë kanë nisur të ankohen për ujqër e grabitqarë që po qarkullojnë nëpër ‘pyll’.
“Dalin pamje nga sipër të pyllit orbital. Mendoj që i vetmi problem është që pemët mund të ishin mbjellë më me sistem. Gjithësesi ka diskutime pasi çrregullsia jep ndjesinë e pyllit natyror. Plot 2500 hektar rrap, blir, pisha e të tjera…Kanë filluar ankesat për ujqër, çakej e grabitqar të tjerë që po popullojnë tashmë pyllin që shikoni. Shijojini! P.s po merrem me këtë punën e 1 milion pemëve sepse asgjë nuk i ndryshon Kryetarit të Bashkisë Tiranë nëse deklaron numrin real të mbjellë. A janë 100 000 apo 1000 000 nuk është se vendos diçka në rrugëtimin e tij politik. Po ai gënjen me vetëdije. Më e tmerrshmja është se gënjen pa shkak. Gënjen se i dukemi qenie që duhet të gënjehemi dhe pa shkak.”- shkruan Lapaj.
