Një person i kërkuar si pjesë e një grupi që ndihmonte emigrantë shqiptarë që të kalonin në Angli dhe në Amerikë me pasaporta të falsifikuara, është arrestuar në Tiranë.
“Shërbimet e Seksionit për Hetimin e Trafiqeve të Paligjshme në DVP Tiranë, në bashkëpunim me Sektorin e Forcës së Posaçme Operacionale, bazuar në informacionet e marra në rrugë operative, për vendndodhjen e një shtetasi në kërkim, organizuan dhe finalizuan operacionin policor të koduar ‘Lokalizimi’. Si rezultat i këtij operacioni u bë kapja dhe ndalimi i shtetasit: Eduard (Eduart) Haxhiu, 54 vjeç, banues në Tiranë”, njoftoi policia.
54-vjeçari është dënuar me 7 vjet e 4 muaj burgim, nga Gjykata e Posaçme e Shkallës së Parë për Korrupsionin dhe Krimin e Organizuar Tiranë, për veprat penale “Ndihma për kalim të paligjshëm të kufijve”, “Organizata kriminale” dhe “Kryerja e veprave penale nga organizata kriminale dhe grupi i strukturuar kriminal”.
Gjatë periudhës 2019-2022, ai akuzohet se ka ndihmuar emigrantë shqiptarë që të kalonin në Angli dhe në Amerikë, me pasaporta të falsifikuara.
