Kryeministri Edi Rama deklaroi se pensionistët do të marrin shpërblim 5 mijë lekë të reja në muajin e ardhshëm.
Gazetarja iu kthye duke i argumentuar se diçka e tillë shkel Kodin Zgjedhor i cili thotë se të tilla vendime s’mund të merren deri në 4 muaj para zgjedhjeve për të mos ndikuar qytetarët dhe votën e lirë.
Rama theksoi se askush nuk mund t’i ndalojë për të marrë një vendim të tillë.
“Ky për pensionistët është një adresim në vazhdim i një problem që ekziston, siç ekzistonte dhe më parë, por nëse nuk ndihet, nuk ndihet sepse qeveria shqiptare është aty, në mbrojtje të gjithë konsumatorëve familjarë, të të gjithë bizneseve të vogla që do të thotë problemi i madh i krizës së çmimit të energjisë dhe problemi i madh i inflacionit të luftës. Ne nuk mund t’u themi pensionistëve nga taksa e jashtëzakonshme e cila mblidhet tani në fund të marsit ju s’mund të merrni gjë se janë ca zgjedhje vendore dhe do prisni 4 muaj se kështu kanë vendosur së bashku partitë në ato kinezëritë e tyre për të bërë sisteme që janë të panjohura në botë“- tha Rama.
