Një aksident i rëndë ka ndodhur pak minuta më parë në dalje të Tiranës, pranë zonës së njohur “Rruga e Elbasanit”.
Bëhet me dije se në Rrugën e Elbasanit, shtetasi G. Q., 42 vjeç, duke drejtuar autobusin e linjës së Krrabës, dyshohet se ka humbur kontrollin dhe si pasojë autobusi ka dalë nga rruga dhe është përmbysur. Mediat bëjnë me dije se shoferi i autobusit ka goditur edhe dy automjete të tjera.
Si pasojë janë dëmtuar 3 shtetas të cilët ndodhen nën kujdesin e mjekëve, jashtë rrezikut për jetën. Ndërkohë, mësohet se deri tani 7 persona janë paraqitur në spital me dëmtime të lehta pa probleme. Policia ka mbërritur në vendin e ngjarjes dhe po heton shkaqet e këtij aksidenti.
Transporti publik në Tiranë është kthyer në një shqetësim të vërtetë për qytetarët. Përveç trafikut, vonesave, mbingarkesa, kushteve skandaloze, qytetarëve në kryeqytet shpesh herë u rrezikohet jeta për shkak se autobusët përfshihen në aksidente të njëpasnjëshme. Shkaqet janë të ndryshme, nga shoferë të dehur deri tek kompanitë të papërgjegjshme të cilat në mënyrë “klienteliste” kanë marrë licensat për të operuar në transportin publik.
Njoftimi i policisë:
“Më datë 26.03.2023, rreth orës 15:45, në Rrugën e Elbasanit, shtetasi G. Q., 42 vjeç, duke drejtuar autobusin e linjës së Krrabës, dyshohet se ka humbur kontrollin mbi drejtimin e autobusit dhe si pasojë autobusi ka dalë nga rruga dhe është përmbysur.
Si pasojë janë dëmtuar 3 shtetas të cilët ndodhen nën kujdesin e mjekëve, jashtë rrezikut për jetën.
Pas testit të alkoolit, drejtuesi i autobusit nuk ka rezultuar nën efektin e pijeve alkoolike.
Në vendngjarje ndodhen shërbimet e ambulancës dhe shërbimet e Policisë”
Pamje nga aksidenti:
- Aksidenti i rëndë më 27 shkurt
Në 27 Shkurt, në zonën e njohur si “Shallvaret”, urbani i linjës së Unazës shkaktoi një aksident masiv, duke përplasur disa makina e duke shkaktuar një duzinë me persona të plagosur. Pamjet e marra nga një kamera sigurie treguan si autobusi me shpejtësi të pazakontë përplasi një mjet tip “Audi” e më tej u shkaktua një aksident zinxhir.
Aksidenti i Shkurtit i kompanisë së Nadir Caushollit u parapri nga një tjetër ngjarje me disa të plagosur. Në 22 prill 2022, Në 22 prill 2022, një autobus i shoqërisë “Green Line” doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut. Të paktën nëntë persona mbetën të lënduar, ndërsa çështja u pushua nga gjykata e Tiranës, pasi të dëmtuarit vendosën të tërhiqeshin nga ankimi.
