Bordi i krijuar me vendim qeverise për caktimin e çmimit të tregtimit të karburanteve, ka vendosur këtë të Enjte tarifat e reja, duke rritur naftën dhe benzinën.
Sipas vendimit, një litër naftë do të tregtohet me 187 lekë/litri, nga 182 që është aktualisht.
Rritja pëson edhe benzina që do të shitet në pompa me 185 lekë/litri, 3 lekë më shumë se tani.
Mbetet i pandryshuar çmi i gazit në 75 lekë/litri.
“Çmimet e caktuara nga Bordi do të hynë në fuqi në datë 23 mars, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes”, thuhet në njoftim.
Rreth një vit më parë, qeveria miratoi bordin e transparencës për karburantet, me synimin – siç u deklarua të paktën publikisht – ngrirjen e marzheve të fitimit për kompanitë tregtuese si edhe transparencën e çmimit. Vendimi erdhi pas rritjes së shpejtë të çmimeve, që iu atribuua gjegjësisht efekteve nga lufta në Ukrainë.
Ekspertët megjithatë janë shprehur skeptikë për mënyrën e funksionimit të bordit dhe qëllimit të tij. Nga opozita ndërkohë, bordi është cilësuar si një tjetër mekanizëm në dorën e qeverisë për të vjedhur qytetarët.
Një grup deputetësh kanë depozituar një padi në Kushtetuese kundër bordit, që ditët në vijim pritet të dalë me një vendim.
Më herët, e njëjta Gjykatë e cilësoi antikushtetues një strukturë të ngjashme të ngritur nga qeveria, që caktonte çmimet e disa produkteve të shportës.
