Gjykata e Apelit e dënoi të akuzuarin për vrasjen e ish-deputetit demokrat Azem Hajdari në tetor të vitit të kaluar me 21 vite burg.
Por, Izet Haxhia duket se nuk është dakord me vendimin e togave të zeza dhe këtë të mërkurë, mësohet se ka depozituar rekurs në Gjykatën e Lartë.
Haxhia kundërshton vendimin e Apelit të Tiranës, e cila la në fuqi dënimin e vendosur në shkurt të vitit 2021 nga Gjykata e Shkallës së parë, pas rihapjes së çështjes “Hajdari” dhe ekstradimit të të akuzuarit nga Turqia.
Gjykata asokohe dha vendimin për dënimin, pasi Haxhia kërkoi rihapjen e dosjes së cilësuar si “Vrasja e shekullit”.
Haxhia u ekstradua në Shqipëri nga Turqia, pasi ishte arratisur atje prej vitit 2006 ndërsa më herët ishte dënuar në mungesë me 25 vite burg.
Ndërkohë, Gjykata e Lartë ende nuk e ka caktuar datën kur pritet të shqyrtojë rekursin në dhomën e këshillimit.
