Çështja e korruptimit të gjyqtarëve që ka për protagonistë klubin e Barcelonës, vazhdon të trondisë futbollin spanjoll. Në pyetje së fundmi është marrë ish-nënkryetari i komisionit të arbitrave, José María Enríquez Negreira, të cilit iu desh të shpjegonte pse klubi katalanas i paguante shuma të konsiderueshme parash për vite me radhë.
“Thjesht për këshilla teknike“, është shprehur Negreira, por gazeta spanjolle “El Mundo” zbuloi të mërkurën një listë me dhurata që ai do t’u kishte blerë gjyqtarëve me paratë e marra nga Barça.
Midis 2001 dhe 2018, José María Enríquez Negreira do të kishte marrë një total prej më shumë se 8 milionë euro nga FC Barcelona.
Por çfarë i dha ai klubit në këmbim?
“Kam parë ndeshjet dhe kam informuar klubin se pse janë marrë vendime të caktuara nga gjyqtarët në fjalë”, pohon ish-zëvendëspresidenti i komisionit të arbitrave në Spanjë.
“Barcelona, për mendimin tim, ndjeu se ishte në disavantazh dhe se skuadrat e tjera ishin të favorizuara. Detyra ime ishte të jepja mendimin tim për arbitrazhin, këshillat teknike. Ajo që dëshironte Barcelona ishte neutraliteti rreth gjyqtarëve”, shtoi ai.
Dhe pyetjes pse u ndalën pagesat në vitin 2018, kur ai dha dorëheqjen nga komiteti i arbitrave, Negreira iu përgjigj duke thënë: “Barcelona vendosi atëherë. Por unë madje i dërgova klubit një letër duke u ankuar për një shkelje të kontratës”.
Nga biletat e futbollit në proshutë spanjolle
Kur u pyet nëse ka paguar ndonjëherë një (ish) arbitër me paratë e Barcelonës, përgjigja e tij ishte e shkurtër dhe koncize: “JO”.
Por sipas “El Mundo”, Negreira e përdori shumë 8 milionë euro për të blerë dhurata për gjyqtarët.
Gazeta zbuloi një listë dhuratash që ai mund t’i fshihte nga taksat nëpërmjet kompanisë së tij. Nga biletat për garat sportive deri tek proshutat e shtrenjta spanjolle, çadrat e plazhit dhe çantat.
Por edhe verë, liker, ëmbëlsira dhe djathë. Përveç kësaj, Negreira do t’i kishte çuar gjyqtarët në restorantet më të mira të peshkut në Barcelonë dhe Madrid për të ngrënë atje për më shumë se 2,000 euro një darkë.
Vetë Negreira ka një shpjegim për gjithçka. Për shembull, ai deklaroi se vëmendja thjesht erdhi vetë dhe se në shumë raste ato rimbursoheshin edhe nëpërmjet transfertave bankare.
