Grupi “Alibeaj” që ka fituar të drejtën për të hyrë në zgjedhje me logon e Partisë Demokratike, me kryetar të komanduar pikërisht deputetin Enkelejd Alibeaj, ka ankimuar sot në KAS regjistrimin e koalicionit “Bashkë Fitojmë”.
Në ankesën dërguar KAS, përfaqësuesi ligjor i “Alibeaj”, Indrit Sefa pretendon se marrëveshja e koalicionit që është firmosur nga Sali Berisha, Ilir Meta, Vangjel Dule e Nard Ndoka, përmban referenca të Partisë Demokratike.
Këto referenca janë vendosur sipas tyre në kushtet kur kjo forcë politike apo kryetari i saj, nuk ka shprehur vullnetin për të marrë pjesë në këtë koalicion.
Në konkluzionin e paraqitur nga Sefa, thuhet se marrëveshjes i mungon elementi për përcaktimin e kandidatëve nga secila parti politike dhe theksohet se “Komisioni i Rithemelimit” nuk mund të nxjerrë kandidatë për procesin zgjedhor në 14 maj.
“Në kushtet kur subjekti politik “Komisioni i Përkohshëm i Themelimit” është përjashtuar nga marrëveshja, mbetet e paqartë se cila parti politike do të propozojë kandidatët e koalicionit”, thuhet në kokluzionin e grupit “Alibeaj”, që kërkon në këtë mënyrë përjashtimin e opozitës nga zgjedhjet.
Ndërkohë, sa i përket koalicionit “Bashkë Fitojmë”, më 18 mars prej tij u përjashtua Sali Berisha, pasi Ilirjan Celibashi nuk e regjistroi kreun e PD.
Ky koalicion tanimë do të përbëhet nga tre partitë politike Partia e Lirisë (PL), Partia Bashkimi për të Drejtat e Njeriut (PBDNJ) dhe Partia Demokristiane (PDK).
“Jemi përballë të njëjtës situatë si përpara zgjedhjeve të pjesshme të 6 marsit 2022. Regjistrojmë koalicionin “Bashkë Fitojmë”, por vetëm me pjesëmarrëse PL, PBDNJ dhe PDK”, theksoi Celibashi gjatë fjalës së tij.
