Banorët e Bërxullës kanë dalë sërish sot në protestë, duke kundërshtuar ndërtimin e autostradës Thumanë-Kashar mbi tokat dhe shtëpitë e tyre, në një kohë që qeveria u ka ofruar shpronësim me vlerë qesharake.
Prej më shumë se 4 muajsh banorët e kësaj zone vazhdojnë protestojnë, pasi nuk bien dakord me çmimin që u ofrohet për të kompensuar pronën e tyre.
Mëngjesin e kësaj të diele, banorët së bashku me fëmijët e tyre janë ulur këmbëkryq në mes të rrugës, duke bllokuar kështu aksin Thumanë-Kashar. Kaq ka mjaftuar që të krijohet përplasja mes protestuesve dhe efektivëve të policisë të cilët kanë rrethuar zonën duke kërkuar që të lirohet rruga.
Një nga banoret thotë se një prej efektivëve e ka shtyrë dhe dhunuar duke e qëlluar me shkelmë. Ajo bashkë me një qytetare tjetër i ka kërkuar të ndalonte, po situata u përshkallëzua. Kujtojmë se në protestë gjendet fëmijë, vajza gra dhe burra.
“Pse na provokoni”, janë duke thënë banorët ku e shohin këtë si një akt provokues.
“Kujt shteti i shërben ti?”, dëgjohet të thotë një tjetër banore.
“Nuk do lejojmë asnjë fadromë që të vijë në tokët tona. Shteti nuk do t’ia dojë për ne që kemi 6 muaj në rrugë. Kemi kaq kohë që nuk na zë gjumi natën. Na është sosur durimi, nuk vjen as ministria e Bujqësisë, as e Infrastrukturës, as Belinda nuk vjen të pyesë”, u shpreh një prej protestueseve.
“Do e bllokojmë aksin të gjithë, çdo ditë në protestë. Do hyjmë në grevë urie. S’ka zgjidhje tjetër, ose të vijë shteti këtu. Pse duhet të shkojmë në gjyq ku shteti e ka në dorë. Shteti e di që nuk kemi bërë asgjë të paligjshme. Nëse duan rrugë, hajde të vijnë të merren vesh me banorët” – tha një prej banorëve.
Banorët shprehen se ka pasur tentativa për negociata nga ana e kompanisë që do të zhvillojë projektin por theksojnë se nuk besojnë asgjë në rast se nuk arrijnë kompromis të dokumentuar.
“Ka pasur tentativa për negociata nga kompania, jo nga shteti. Kompania thotë për vlerën e banesave që ofrohet një çmim sipas tre mujorve që është çmimi 75 euro për metër. Ne këto i duam të dokumentuara. Se me llafe kemi 170 ditë që jemi ngopur. Do të vazhdojmë protestën tonë të panegociueshme”, është shrehur një banor.
Të vendosur, thonë se ato do të mbrojnë tokat e tyre deri në vetëflijim, dhe se nuk do të lejojnë firmën ‘Gener 2’ të futet në tokat e tyre, teksa kanë paralajmëruar se do të nisin edhe një grevë urie.
“Do futemi në grevë urie, nuk do dalim vetëm sot por çdo ditë”- tha banori.
Protestat në Bërxullë, vijojnë prej më shumë se katër muajsh, ndërsa vetëm në këtë fshat rrezikohen të shemben 22 banesa dhe të preken 50 hektarë tokë. Shifra mund të ndryshojë nëse do të ketë devijim të shtyllave të tensionit të lartë. Banorët e Bërxullës kundërshtojnë projektin e zgjerimit të aksit rrugor ‘Thumanë-Kashar’ pasi çmimi i tregut për pronat e tyre është rreth 50 euro për metër katror, ndërsa atyre u është ofruar një kompensim me rreth 4 euro për metër katror, gjë që ata e kanë refuzuar kategorikisht.
