Ambasadorja amerikane Yuri Kim e ka kaluar paraditen e kësaj të Shtune në shoqërinë e presidentit Bajram Begaj. Në një postim në rrjete sociale, ajo thotë se ndihet e nderuar sa herë diskuton me Begajn.
“Gjithmonë një nder të kaloj kohë me Presidentin Bajram Begaj, por veçanërisht për të ecur dhe folur së bashku në këtë ditë të bukur pranvere në Tiranë”, shkroi Kim ndërsa publikoi fotografinë nga Liqeni Artifical i Tiranës.
Takimi vjen një ditë pas një fotografie të publikuar në rrjetin social “FB” nga kryeministri Edi Rama, i cili zhvilloi një takim me kreun e shtetit Begaj. Imazhi ngjalli reagime të shumta në rrjet, për vetë pozicionin e Bajram Begajt në raport me shefin e qeverisë dhe mënyrën sesi ky i fundit e trajton kreun e shtetit – ku Presidenti më shumë i përngjante një kamarieri në shërbim të Edi Ramës, që në pozicionin ku ishte ulur dukej si “i zoti i shtëpisë”.
