Një foto e publikuar në rrjetin social Facebook nga kryeministri Edi Rama, për të treguar se sot u takua më Presidentin e Republikës, ka ngjallur reagime të shumta në rrjet, për vetë pozicionin e Bajram Begajt në raport me shefin e qeverisë dhe mënyrën sesi ky i fundit e trajton Kreun e ri të Shtetit.
Rama u ndal sot në Presidencë për t’i propozuar, siç ai vetë njoftoi, Begajt, emërimin e këshilltares së tij nga Kosova, znj.VLORA HYSENI si drejtoreshë të Shërbimit Informativ të Shtetit.
Por, pavarësisht rëndësisë së takimit dhe emrit të propozuar për kreun e SHISH pas largimit të Helidon Bendos, vëmendjen e rrëmbeu pikërisht fotoja që ilustronte takimin, ku Presidenti më shumë i përngjante një kamarieri në shërbim të Edi Ramës, që në pozicionin ku ishte ulur dukej si “i zoti i shtëpisë”.
Kjo foto, e postuar ose jo me tendencë nga kreu i ekzekutivit përbën në veteve një skandal protokollar në raport me Kreun e Shtetit.
Begaj duket në pozicion gjysmë të ulur dhe që në pamje të parë krijo një përshtypje jo të mirë në marrëdhënien mes numrit 1 dhe numrit 3 (kryeministri) të Piramidës shtetërore.
Teksa në rrjet shpërthyen reagimet dhe komentet tallëse e ironizuese për fuqinë dhe kompetencat e Begajt, stafi i Ramës nuk vonoi shumë dhe e ndryshoi foton, duke vendosur një tjetër ku dy figurat e larta të shtetit shfaqen duke biseduar dhe të buzëqeshur, të ulur përballë njëri-tjetrit.
Pavarësisht reagimit të shpejtë të stafit të kryeministrit për të fshirë foton tallëse, në arkivën e takimeve Rama-Begaj janë të shumta imazhet dhe videot kur kryeministri mban një pozicion shpërfillës ndaj Presidentit.
Me talljen e Ramës nisi karriera e Begajt si President, pasi që në ditën kur u takua për herë të parë me të në Kryeministri dhe i ofroji postin e Presidentit, Rama hodhi disa batuta pa kripë që tregojnë vlerësimin e ulët që ka për figurën që përzgjodhi për ta ulur në karrigen e Kreut të Shtetit.
“Hajde zoti President, mirëse erdhe! -Shumë falemindeerit”. Ky ishte dialogu i parë midis Ramës dhe Begajt, asokohe Gjeneralmajor, të cilat lanë përshtypje te publiku.
Analisti Andi Bushati asokohe shpërndante në Facebook disa foto të shkëputura nga videoja e takimit dhe shprehej: “E vetmja gjë e vërtetë në këtë farsën demokratike të përzgjedhjes së Presidentit ishte ai falenderimi i përulur i Begajt për Ramën. E kuptonte dhe ai i ngrati që ishte preferencë personale”.
Padyshim që edhe tallja e hapur që Rama bëri sot me Begajn është vazhdim i sagës së “përuljes” së numrit 1 të shtetit shqiptar ndaj atij që e bëri President, të cilin s’ka guxim as ta shohë në sy, e jo më t’i rrëzojë ligje apo propozime.
