Gjatë një bashkëbisedimi me emigrantët shqiptarë në Britani, kreu demokrat Sali Berisha foli për përpjekjet që sipas tij ambasadori i Britanisë së Madhe ka bërë për ta dëmtuar atë.
Në këtë lojë, sipas Berishës ka qenë Yuri Kim, e cila pasi mori urdhër nga Blinken, u kërkoi përfaqësuesve të tjerë të bashkëpunojnë me të.
“Në këtë shkallë korrupsioni është dhe Yuri Kim. Korrupsionin e saj e kam denoncuar me keqardhje të thellë, se nuk më vjen mirë që të atakoj kështu përfaqësuesin e SHBA-së. E bëj këtë sepse kjo së bashku më Edi Rama ka shkelmuar kushtetutën e Shqipërisë, ka shkelur çdo ligj për të mbajtur në pushtet Edi Ramën.
Pa asnjë fakt, Anthony Blinken më shpalli non grata, zonja në fjalë u kërkoi zyrtarëve të tjerë të solidarizohen po mori një jo të thatë, jo vetëm aq po dhe shkaqet, ku së pari diplomatët i thanë asaj që nuk na keni pyetur dhe nuk keni prova dhe së fundmi e keni marr këtë vendim për të ndihmuar Ramën që ta lëjë vendin pa opozitë.
Po nga të njëjtat pozita, me të njëjtën mënyrë, veproi dhe ambasadori i BM, edhe ky është një lloj Mc Gonigali që ka mashtruar qeverinë e Madhërisë së tij, në çdo gjë që i ka treguar për mua. Do t’i bëjë publike trillimet e ulëta, po BM është shtet ligjor dhe unë kam besim të madh te drejtësia e vendit ku jeni ju. Ky diplomat i korruptuar vazhdon të mashtrojë qeverinë e vetë se unë gjoja sulmoj qeverinë e madhërisë, gjë që nuk e kam bërë. Pas shpalljes nongrata dhe vendimit të Lulzim-Bravës për largimin tim ky u angazhua, fshehtas thërriste një nga një deputetët e Rithemelimit t’i kthente kundër meje. Përpiqej me çdo kusht që opozita shqiptare mos të ishte një opozitë e vërtetë”, tha Berisha.
Berisha po ashtu ka akuzuar qeverinë Rama për përfshirje në grupe kriminale dhe përmendi me radhë ngjarjet e rënda që kanë ndodhur. Berisha e akuzoi Ramën për vjedhje, duke thënë se 80% e buxhetit grabitet.
“Një javë më parë arrestohej një lehonë me një foshnë 8 ditëshe për një gjobë. Një javë më parë u ekzekutua një zonjë në banak, që punonte dy punë dhe mbante mbesën, prej bandave, ku një nga anëtarët e tyre u la i lirë nga policia. Në Shqipëri ligji nuk ekziston për qytetarët, nuk u jep mbrojtje. Liritë e tyre janë të nëpërkëmbura. Kjo është një anë, ana tjetër është çfarë ndodh me pasuritë e tyre.
Sot buxheti i shqiptarëve, në masën 80-90% vidhet nga kjo qeveri. Do të thoni ju me të drejtë, si mundet, si ndodhë? Thjeshtë, çdo punë publike që kryhet në Shqipëri, bëhet me një çmim, 6-8-10 herë më të shtrenjtë, sesa duhet të ishte në përputhje me manualet e punëve publike. Kështu në rast se 1 km rrugë në fushë në Gjermani ndërtohet me 2-3 mln euro, në Shqipëri ajo ndërtohet me 24 mln euro. Në rast se një shkollë ndërtohet me 700 mijë euro sipas standardit, në Tiranë ajo ndërtohet me 6 mln euro.
I tërë buxheti shpërdorohet, vidhet nga sekti i rilindjes dhe shqiptarët zhyten çdo vit e më shumë në varfëri. Të njëjtëin fat kanë edhe pasuritë publike. Kemi pasur dy vite plot lagështi dhe shira, digat tona kanë qenë plot. Shqipëria sot falë HEC-eve private prodhon 2 miliardë kilovat orë energji elektrike më shumë se nevoja totale e saj. Megjithatë çfarë ndodh? Këta qeveritarë zbrazin digat, shesin energjinë në verë tek sekserët e tyre me çmime të ulëta qesharake, dhe pastaj këta sekserë e shesin në bursë me çmime 3-5-6 herë më të larta dhe këto para i ndajnë me qeveritarët.”, tha Berisha.
