Pasi anuloi takimin ditën e djeshme, kryeministri Edi Rama do të mbledhë mesditën e sotme Kryesinë e Partisë Socialiste në selinë rozë.
Mbledhja dje u shty për shkak të angazhimeve të grupit parlamentar të PS në seancën plenare. Ndërkohë, Kryesia pritet të mblidhet pasdite. Aktualisht kupola e PS-së është e angazhuar në terren në kuadër të zgjedhjeve lokale të 14 majit, për evidentimin e kandidatëve me të cilët do të përfaqësohen.
Një numër i konsiderueshëm i kryebashkiakëve aktualë do të rikandidojnë në zgjedhje nën siglën e PS, por ka dhe emra të rinj që do i shtohen garës.
Rama para dy ditësh ka porositur deputetët socialist që aplikacioni “Aktivisti” të vazhdojë të përdoret nga të gjithë në administratë, në mënyrë që të ketë angazhim maksimal për zgjedhjet që pritet të mbahen për më pak se 2 muaj.
Kryetari i Partisë Demokratike, Sali Berisha ka denoncuar se kryeministri Edi Rama së fundmi ka shpikur një aplikacion që mat “Like”-et dhe “Komentet” e punonjësve të adminsitratës duke i detyruar ata që të jenë aktiv në rrjetet sociale. Sipas Berishës, Rama kërcënon se do të shkarkojë nga puna këdo punonjës të administratës që nuk pëlqen dhe nuk komenton postimet e qeverisë në rrjetet sociale.
