Nga Boldnews.al
Mbesa 10-vjeçare priste që gjyshja të mbyllte turnin ku punonte si banakiere dhe kamariere bashkë në një nga lokalet e Tiranës. Me tabaka në duar, ajo në fakt nuk po shërbente gotat me alkool të tavolinës me disa burra, por “plumbin” që do i merrte jetën, pa pasur mundësi të linte edhe amanetet e fundit.
Breshëria e armëve të shtëna nga grupet kriminale, ndaj disa të dyshurve si pjesë e grupeve kriminale i mori jetën 58-vjeçares Mimoza Paja dhe la të plagosur mbesën e saj, vetëm 10-vjeçare që priste gjyshen të mbaronte atë punë të shkretë që përkthehej në bukën e gojës.
Lagjja “Don Bosko” në Tiranë, që paradoksalisht mban edhe emrin e një prifti Italian bamirës dhe përkrahës i shtresave në nevojë, u kthye në një zonë ku krimi të vret pa fajt dhe policia e drejtësia jonë nuk të prekin kur je me faj. Synimi i dy personave të armatosur ishte të vrisnin të paktën një nga burrat që qëndronte ne tavolinën e lokalit, por pa matur mirë shenjëstrën e aq më pak të mendonin se kishte të tjerë njerëz të pafajshëm qëllun duke vrarë banakieren 58-vjeçare, plagosur pesë të tjerë, ndërmjet tyre edhe vajzën dhjetë vjeçare që lëshoi piskamën kur pa gjyshen pa jetë në dyshemene e barit që po aq paradoksalisht me letra duhet të ishte i sekuestruar me urdhrin e SPAK-u të “madh”.
Një dëm të “vogël anësor” mund ta quajnë drejtuesit e pushtetit humjen e jetës së një gruaje pa faj. Po ky “dëm anësor” vijon e vijon të përsëritet pa breje ndërgjegje të atyre që kanë përgjegjësinë për të mbrojtur jetën e çdo qytetari në vend. Vrasja makabre, largimi më pas nga vendi i krimit dhe rituali i djegies së makinës, pothuaj në të njëtën zonë siç është Fushë-Kruja, është kuja e madhe që nuk po dëgjohet nga veshët e pushtetit. Përkundrazi, këtë “dëm anësor” sot e kanë harruar edhe pse një jetë pa faj iku dhe një vajzë e vogël vetëm dhjetë vjeçe do të rritet me traumën e madhe pasi pa gjithë skenën sesi gjyshja e saj e dashur dha frymën aty nën këmbët e saj.
Me parimin: “hëngshin kokat e tyre”, kryeministri Edi Rama, ministri Çuçi dhe krerët e policisë po amnistojnë çdo krim të rëndë që ndodh në vend. Bandat janë rrugëve dhe bredhin të armatosur dhe makina të shtrenjta, duke vrarë jo vetëm njëri-tjetrin por edhe qytetarë pa faj. Edhe shprehja idiote se u “ndodhën në vendin dhe kohën e gabuar” është justifikim dhe papërgjeshmëri e pushtetit për jetët pa faj që humbin, vetëm sepse ndodhen në rrezen e pakontrolluar të armëve të krimit. Po vetë krimi ku është?
Në fakt armët që ata përdorin po i “mbush” pushteti me apatinë e tij, në raste të ndryshme edhe me mbështetjen e tij. Sot bandat e quajnë veten në mbështetje të pushtetit, ashtu si në Elbasan, Tiranë, Durrës, Shkodër, Vlorë e kudo tjetër ku pushteti i përdor për “breshëri votash” dhe më pas i le të lirë që të zbrazin armët për të fituar territor, pa I brerë ndërgjegja për jetët e humbura të qytetarëve pa faj. Është kohë zgjedhjesh, kujdes “dëmet e tjera anësore”, sepse plumbat e krimit janë futur në armë dhe një dorë e fuqishme ua ka bërë gati për zbrazje.
