Ish-zëvendëskryeministrit Arben Ahmetajt i është sekuestruar dokumentacioni i pasurive të tij, si dhe pronave të partneres aktuale dhe ish-bashkëshortes.
Sekuestrimi i dokumentacionit është në kuadër të hetimeve që SPAK po zhvillon ndaj Arben Ahmetajt.
Prej datës 6 mars të këtij viti, Prokuroria e Posaçme ka nisur hetimin pasuror ndaj Ahmetajt. Në një procesverbal të kësaj date, evidentohen pasuritë në emër të ish-bashkëshortes së Ahmetajt dhe partneres aktuale.
Nga ana tjetër, disa javë më parë, SPAK konfirmoi se “objekt i hetimeve (për dosjen e inceretorëve) janë një sërë rrethanash që përfshihen veprimet e Arben Ahmetajt”.
Agjëntë të Byrosë Kombëtare të Hetimit zbarkuan mbrëmjen e sotme në vilën e partneres së Ahmetaj, te Gjiri i Lalzit.
Po ashtu, raportohet se është kontrolluar edhe shtëpia e ish-bashkëshortes së deputeti socialist. Në kontrollin e kryer në shtëpinë e ish-bashkëshortes nuk është gjetur asgjë e paligjshme, por raportohet se janë sekuestruar disa dokumente që vlerësohen të rëndësishme për hetimet. Ndërsa në shtëpinë e partneres deri tani, sipas disa raportimeve mediatike, është gjetur një shumë parash prej 30 mijë eurosh.
Përplasja me Ramën
Lëvizja e SPAK vjen në një kohë kur ftohja e marrëdhënies së Arben Ahmetajt me kryeministrin Edi Rama duket se ka arritur kulmin dhe këtë e kanë konfirmuar të dy përmes deklaratave publike.
Ishte fillimisht kryeministri Edi Rama, i cili në një intervistë televizive më 16 Shkurt, duke folur për akuzat ndaj Ahmetajt, tha se “këto gjëra që dalin qofshin të vërteta, më vjen shumë keq, por se ndihmoj dot”.
“Kur kam nisur luftën për reformën në drejtësi e kam bërë se e besoja dhe e kam ditur se ajo luftë do të thotë që të hapësh rrugën që drejtësia të ketë në dorë armë që se kontrollon dot dhe të godasë majtas e djathar. Kur numërohen këto raste (ish-ministrat e deputetët e PS të arrestuar) mua s’më vjen mirë natyrisht se në aspektin njerëz me gjithë këta njerëz kam pasur marrëdhënie, por kjo është gjëja që unë kam premtuar që kush shkel ku s’duhet, përgjigjet. Dhe gjëja që unë kam thënë është që ‘jemi një skuadër, luftojmë për qëllimet e shpallura, kush gabon rrugë ose i merr koka erë dhe bashkë me qëllimet e shpallura kërkon të realizojë gjërat e tjera, do ti dalë për zot vetë pastaj. Që në kohën e Tahirit kamë thënë që PS s’është zyrë avokatie”, tha Rama.
“Ahmetaj ka qenë bashkëpunëtor i imi, kam punuar për një kohë të gjatë dhe këto gjëra që dalin, në qofshin të vërteta më vjen shumë keq, por se ndihmoj dot, në qofshin të vërteta”, shtoi.
Një javë më vonë, ishte radha e Ahmetajt ti përgjigjej Ramës.
Në një intervistë televizive, deputeti socialist mohoi akuzat ndaj tij lidhur me aferën e inceneratorëve, si dhe lidhjet me personat e shpallur në kërkim.
Deklaratave të Ramës iu përgjigj duke thënë: “Unë Edi Ramës nuk i kam kërkuar ndonjëherë ndihmë. Po them vetëm kaq. Nuk do desha të isha në vendin e Kryeministrit që të pretendoja të bëja gjykatësin. Ai për mua, sugjerim, të bëjë atë që bën më mirë, Kryeministrin. Gjykatësi është çik i sikletshëm, duhet të njohësh procedurat me detaje”.
Këtë të Enjte, Rama u kundërpërgjigj.
Në një deklaratë për gazetarët, ai u pyet: Si e komentoni që Ahmetaj ka thënë Rama duhet të bëjë rolin e kryeministrit dhe jo të gjykatësit?
Në përgjigje, kreu i qeverisë tha: “Nëse unë do të bëja rolin e gjykatësit, gjërat do të kishin qenë shumë më keq për ata që duan që unë të bëjë gjykatësin”.
Lexo edhe:
Detajet/ Çfarë u sekuestrua në banesat e partneres dhe ish-bashkëshortes të Ahmetajt
