Biznesmeni Lirim Fejzollari ka dëshmuar këtë të hënë në Gjykatën e Posaçme Antikorrupsion në gjyqin për dosjen “Buka”, me të pandehur ish zëvendës kryeministrin dhe ish ministrin Arben Ahmetaj.
Në dëshminë e tij, ai ka theksuar se për privatizimin e “Buka sha”, janë kryer të gjitha procedurat e nevojshme. Sipas tij, aksionet i ka marrë nga disa qytetarë dhe shoqëri duke arritur deri në 40 përqind të pjesës private.
“Unë kam qenë aksioner dhe më parë, kur ishte edhe 52 % shtet edhe 48 % privat dhe u futa dhe në ankand. Unë kam marrë aksione nga disa qytetarë dhe shoqëri dhe kam arritur deri tek 40% e pjesës private. Aksionet i kam blerë nga individë dhe kompani, që i kishin këto aksione.”, ka deklaruar ai.
Në lidhje me Ahmetajn, ai ka deklaruar se e ka takuar gjatë kohës kur ishte ministër. Sipas tij, kishin probleme me çështjen e pullave fiskale.
“Shtetasin Arben Ahmetaj e njoh si person publik. Në mënyrë zyrtare jam takuar me të në 2018-2019. Ishte ministër. Ne kishim probleme me industrinë, për çështjen e pullave fiskale. Jam vënë në dijeni shumë më vonë me një vendim të Gjykatës Administratives për pezullim të procedurave të ankandit.
Në lidhje me “Buka sha” jam takuar me familjen Myderizi. Nuk i njihja. Në takim më thanë disa pretendime, që as nuk i kuptova. Ndërsa familjen Piciri i kam takuar disa herë. Kam biseduar shumë qetë me ta. Unë nuk i kuptoj këto kthimet e pronave. Ju kam thënë, keni gjykatat, kërkojini tek institucionet shtetërore.”, ka shtuar ai.
Më pas, biznesmeni është pytur edhe për një sms të dërguar në telefonin e tij nga ish ministri Ahmetaj, ku i thoshte se duhet ta telefononte.
Prokurori: si e shpjegoni një sms në telefonin tuaj: “Më telefono pak. Arben Ahmetaj jam”?
Fezollari: Duhet të ketë qenë në fazën e pullave fiskale, diskutimet që bënim.
Prokurori: Në 23.02.2020 i thoni Ahmetajt me sms “Përshëndetje Arben! Si i ke mundësitë për t’u takuar këtë javë”.
Fezollari: Siç e thashë, kishim problemet me pullat. Por ky takim nuk i realizua.
Fezollari është pronar i kompanive kompanive “Emerald Mall”, “NEXT” dhe “TOBACCO HOLDING”.
