Edi Rama ka pritur dy javë për t’i kthyer një përgjigje direkte dhe të ashpër ish-zëvendësit të tij, njëherësh ish-ministrit të Financave, Arben Ahmetaj.
Deklaratës së fortë të Ahmetajt në studion e “Opinion” ku i bëri thirrje shefit të qeverisë që “të mos bëjë gjykatësin”, teksa u pyet për çështjen e inceneratorëve, Rama iu përgjigj këtë të enjte pas mbledhjes së Kryesisë së PS.
Kryeministri nuk mund t’i shpëtonte ngacmimit të gazetarëve lidhur me “krisjen” në raportin mes tij dhe Ahmetajt, teksa dilte nga mbledhja në selinë rozë.
“Si e komentoni që Ahmetaj ka thënë Rama duhet të bëjë rolin e kryeministrit dhe jo të gjykatësit?”, ishte pyetja e drejtpërdrejtë për Ramën, i cili u përgjigj duke thënë: “Nëse unë do të bëja rolin e gjykatësit, gjërat do të kishin qenë shumë më keq për ata që duan që unë të bëjë gjykatësin”.
Kujtojmë se të enjten e 24 shkurtit, Ahmetaj mohoi dhe akuzat që janë ngritur ndaj tij, në një dosje të depozituar në SPAK, se Klodian Zoto i ka paguar atij e bashkëjetueses udhëtime dhe hotele jashtë vendit, duke i quajtur spekulime, ndërsa mesazhin më pikant e rezervoi për shefin e tij në PS.
“Unë Edi Ramës nuk i kam kërkuar ndonjëherë ndihmë. Po them vetëm kaq. Nuk do desha të isha në vendin e Kryeministrit që të pretendoja të bëja gjykatësin. Ai për mua, sugjerim, të bëjë atë që bën më mirë, Kryeministrin. Gjykatësi është çik i sikletshëm, duhet të njohësh procedurat me detaje”, tha Ahmetaj në emisionin “Opinion”.
LEXO EDHE:
Inceneratorët, Ahmetaj mesazh Ramës: Mos të bëjë gjykatësin se është punë me siklet!
