“Mos bëj gjykatësin”. Ky ishte mesazhi që i dërgoi ish-zëvendësministri Arben Ahmetajt për shefin e tij politik Rama, pas deklaratave të këtij të fundit një javë më parë.
“Unë Edi Ramës nuk i kam kërkuar ndonjëherë ndihmë. Po them vetëm kaq. Nuk do desha të isha në vendin e Kryeministrit që të pretendoja të bëja gjykatësin. Ai për mua, sugjerim, të bëjë atë që bën më mirë, Kryeministrin. Gjykatësi është çik i sikletshëm, duhet të njohësh procedurat me detaje”, tha Ahmetaj në emisionin “Opinion” këtë të Enjte.
Ish-ministri i Financave mohoi dhe akuzat që janë ngritur ndaj tij, në një dosje të depozituar në SPAK, se Klodian Zoto i ka paguar atij e bashkëjetueses udhëtime dhe hotele jashtë vendit.
Ai i quajti akuzat spekulime.
“Këto janë spekulime, nuk është i vërtetë. Nuk kam fjetur unë dhe nuk kam paguar me kartën e Zotos, nuk ja kam kërkuar asnjëherë kartën Zotos, janë spekulime të pastra. Ishalla do Zoti dhe arrini ta pyesni ndonjëherë ndonjë nga ata”, u shpreh.
“Nuk kam nevojë unë të më paguajë njeri hotelin. Unë kam qenë privat dhe vetëm divident në tatime të deklaruara kanë shkuar 1 milion dollar. Dhe vetëm nga shitja e kompanisë sime kanë shkuar gati 1 milionë dollar”, tha më tej Arben Ahmetaj, duke iu referuar një kompanie për të cilën është akuzuar se ka përvetësuar në mënyrë të jashtëligjshme miliona dollarë para publike.
Ai mohoi dhe akuzat se i është falur një vilë në gjirin e Lalëzit nga Klodian Zoto.
“Është blerë me transfertë bankare nga Erjola (bashkëjetuesja) nga një person që s’e ka emrin fare Klodian Zoto. ”, tha ai.
